Koronavırýs: Óskemende kópshilik oryndardaǵy balalar oıyn alańdary jabyldy
ÓSKEMEN. QazAqparat – Óskemen qalasynda koronavırýstyń aldyn alý maqsatynda kópshilik oryndardaǵy balalar oıyn alańdary jabylǵan, dep habarlaıdy QazAqparat.
Bul jaıly búgin qala ákimdiginde ótken jıyn barysynda shahar basshysy Jaqsylyq Omar málim etti.
«Prezıdent Qasym-Jomart Toqaevtyń tapsyrmasyna sáıkes, koronavırýstyń taralýyna jol bermes úshin birqatar sharalar qolǵa alynǵan. Atap aıtqanda, bıznes ókilderine dezınfektsııalaý jumystaryn júrgizý jaıly keńes berildi. Barlyq mádenı-kópshilik sharalar, sporttyq saıystar keıinge shegerildi. Kópshilik oryndardaǵy balalar oıyn alańdary jabyldy. Sondaı-aq 13 naýryzdan bastap bilim berý mekemelerindegi úıirmeler, qosymshalar toqtatyldy», - deıdi ol.
Esterińizge sala ketsek, Memleket basshysy Qasym-Jomart Toqaev koronavırýs pandemııasyna baılanysty Qazaqstanda qoǵamdyq is-sharalardyń toqtatylatynyn jarııa etken bolatyn.
