Koronavırýs órshigen elderde qansha qazaqstandyq júr

NUR-SULTAN. QazAqparat - QR Bas memlekettik sanıtar dárigeri Jandarbek Bekshın koronavırýs órshigen elderde qansha qazaqstandyq júrgenin jarııalady, dep habarlaıdy QazAqparat tilshisi.

«QR Syrtqy ister mınıstrligi koronavırýs aýrýy órshigen memleketterde qansha qazaqstandyqtyń júrgenin habarlady. Qoldaǵy málimetke sáıkes, Ońtústik Koreıada - 34 myń, Japonııada - 180, Iranda - 170-ke jýyq qazaqstandyq bar», - dedi bas sanıtar dáriger Ortalyq kommýnıkatsııalar qyzmetinde ótken baspasóz máslıhatynda.

Buǵan deıin J. Bekshın koronavırýs boıynsha asa qaýipti memleketterden kelgen qazaqstandyqtardyń úı karantınine oqshaýlanatynyn habarlaǵan edi. Bul tizimge Qytaı, Ońtústik Koreıa, Japonııa, Italııa, Iran, Gonkong, Makao, Taıvan engen.

Sonymen birge, koronavırýs ınfektsııasyna baılanysty Qazaqstan Ońtústik Koreıa men Iranǵa áýe reısterin shekteıdi .