Koronavırýs: Oralda úsh naýqas ókpeni jasandy jeldetý apparatyna qosylǵan
ORAL. QazAqparat – Oblystyq juqpaly aýrýlar aýrýhanasynda koronavırýstan emdelip jatqandar ishinde tórt adam aýyr halde jatyr, dep habarlaıdy QazAqparat tilshisi.
BQO densaýlyq saqtaý basqarmasynyń basshysy Bolatbek Qaıýpovtyń brıfıngte málim etkenindeı, olardyń úsheýi ókpeni jasandy jeldetý apparatyna qosylǵan.
Ekeýi 79 jáne 68 jastaǵy emdelýshiler bolsa, bireýi – bala.
Jalpy, oblysta 665 adam koronavırýs dertimen tirkelse, sonyń 30-y – balalar.
Qazirgi tańda 300 adam (12-si – bala) statsıonarda emdelýde. Munyń 135-i – aýrý belgisi sezilmeıtinder. 104-i jeńil, 57-si ortasha halde.
«Tek ótken demalys kúnderi koronavırýs juqtyrǵan 85 adam (senbide – 41, jeksenbide – 44) aýrýhanaǵa tústi», dedi B.Qaıýpov.
BQO ákimdigi málim etkenindeı, óńirde sońǵy tirkelgen 44 naýqastyń 35-i – buryn koronavırýs juqtyrǵandarmen baılanysta bolǵandar. 9 adamnan profılaktıkalyq maqsatta synama alynǵan.
Oblysta indetke qarsy sharalar jalǵasýda.
Eske sala keteıik, budan buryn Oralda koronavırýstan kóz jumǵan er adam Teńiz ken ornynda jumys istegenin jazǵan bolatynbyz.
Oblystyq densaýlyq saqtaý basqarmasy basshysynyń sózine qaraǵanda, koronavırýstan qaıtqandar úshin qalalyq zıratta arnaıy oryn bólingen. Marqumdar sonda jerlendi.
