Koronavırýs: Oralda bir adamnyń jaǵdaıy aýyr
ORAL. QazAqparat – Oralda oblystyq juqpaly aýrýlar aýrýhanasynda jatqan bir adamnyń jaǵdaıy aýyr, dep habarlaıdy QazAqparat tilshisi.
Oblystyq densaýlyq saqtaý basqarmasynyń basshysy Bolatbek Qaıýpovtyń brıfıngte málim etkenindeı, áıel qazirgi kezde jansaqtaý bóliminde jatqanymen, birte-birte aýrýynan aıyǵyp keledi.
«Sońǵy eki-úsh kúnde qyzýy baıqalmaıdy. Taıaýda palataǵa aýystyrylady dep otyrmyz», dedi B.Kaıýpov.
Oblysta barlyǵy 120 adam tirkelse, sonyń jeteýi jazylyp shyqty. 113 adam emdelýde. Sonyń ishinde 79-ynda aýrý jeńil túrde ótýde. 33-iniń jaǵdaıy ortasha aýyr. Sonyń tórteýine pnevmonııa dıagnozy qoıylǵan, tynys alýynda jetimsizdik jáne qyzýy bar.
«Tótenshe jaǵdaı kezinde qaýipti keselge shaldyqqan adamdardy der kezinde anyqtap, jedel emdeýdiń mańyzy zor. Kúni búginge deıin ózge óńirlerden kelgen 16 myń adam monıtorıngiden ótkizildi. 1500-den astam adam provızorlyq jáne karantındik statsıonarlarda jatyp shyqty. 5 myńnan astam zerthanalyq synamalar alyndy. Osyǵan oraı aldyńǵy shepte júrgen medıtsına qyzmetkerleriniń kásibı ári qaýyrt qyzmet atqaryp jatqanyn atap ótkim keledi», dedi B.Qaıýpov.
Eske sala keteıik, budan buryn BQO-da koronavırýs juqtyrǵan 13 turǵynnyń barlyǵy Reseıden kelgenin, taǵy bir turǵynnyń emdelip shyqqanyn jazǵan bolatynbyz.
