Koronavırýs Ońtústik Afrıkada da tirkeldi
KEIPTAÝN. BBC - QazAqparat – Ońtústik Afrıkada koronavırýspen baılanysty birinshi jaǵdaı tirkeldi, dep habarlaıdy QazAqparat BBC News. agenttigine silteme jasap.
Jańa vırýs jubaıymen birge Italııaǵa baryp kelgen 38 jastaǵy azamattan anyqtaldy.
Osylaısha, Afrıka qurlyǵynda koronavırýs juqtyrǵandar sany 27 adamǵa jetti. Aýrý juqtyrǵandardyń basym bóligi Aljırde – 17 adam, odan keıin Senegalda – 4 adam.
Ońtústik Afrıka eliniń Densaýlyq saqtaý mınıstri Tsvelı Mhızeniń sózinshe, eki balasy bar ońtústikafrıkalyq jup 1 naýryz kúni Italııadan oralǵan 10 adamnan turatyn toptyń múshesi bolǵan. Qazirgi tańda vırýs juqtyrǵan adam men ony qaraǵan dáriger oqshaýlandyryldy, dedi mınıstr.
Onyń sózinshe, vırýs juqtyrǵan dárigermen baılanysty bolǵan adamdardy anyqtaý úshin eldiń shyǵys bóligindegi provıntsııa Kvazýlý-Natalǵa arnaıy top jóneltildi.
Qazirgi tańda álem boıynsha AITV indetiniń ortalyǵy sanalatyn Ońtústik Afrıkada mıllıondaǵan adamdardyń ımmýndyq júıesi álsiregen. Bul jaǵdaı olardyń jańa vırýsqa qarsy turýyna keri áserin tıgizeri anyq. Afrıkada qazir osyndaı alańdaýshylyq bar.
BBC News sonymen qatar Japonııada koronavırýs juqtyryp, aýrýhanaǵa jatqyzylǵan eki ońtústikafrıkalyq azamattyń saýyǵyp, jaqynda úılerine qaıtatynyn habarlady. Olar ózderi jumys isteıtin Diamond Princess krýızdik laınerinen túskennen keıin baqylaýǵa alynǵan.
Aıta keteıik, atalmysh kemeniń bortyndaǵy adamdar Gonkongten túsip qalǵan jolaýshylardyń birinen koronavırýs anyqtalǵan soń ǵana, ıaǵnı alǵash ret qańtar aıynan bastap karantınge jatqyzyla bastady.
Ońtústik Afrıka úkimeti Qytaıdyń Ýhan qalasynan ózderiniń azamattaryn qaıtaryp alǵylary keletinin málimdegen bolatyn.
«Qytaıdan barlyǵy 185 ońtústikafrıkalyq azamat elge qaıtýǵa nıet bilderip otyr»,-delingen úkimetiń málimdemesinde.
