Koronavırýs: Óńirlerde anyqtalǵan jańa oqıǵalar týraly málimet
16 sáýir, saǵat 10.10-daǵy jaǵdaı boıynsha, Qazaqstanda indetke shaldyqqandar sany 1331-ge jetti. Onyń ishinde Qyzylorda oblysynda – 4, Mańǵystaý oblysynda – 1, jáne Qaraǵandy oblysynda - 2, Pavlodar oblysynda 2 jaǵdaı tirkeldi.
Qyzylorda oblysynda 4 naýqastyń barlyǵy óńir ortalyǵynda anyqtaldy.
«Aýrý juqtyrǵandardyń ekeýi 40 jastan asqan áıel adamdar, qalǵan ekeýi 24 jáne 54 jastaǵy er adamdar. Olardyń barlyǵy koronavırýsqa shaldyqqan adamdarmen baılanysta bolǵan. Synamalar alynyp, PTR dıagnostıkalyq zertteý nátıjeleri boıynsha COVID-19 dıagnozy rastaldy. Qazirgi tańda naýqastarmen qarym-qatynasta bolǵan adamdar anyqtalýda. Olar der kezinde medıtsınalyq baqylaýǵa alynyp, oqshaýlanyp, tekseristen ótip jatyr», - delingen Memlekettik komıssııanyń shuǵyl shtabynyń aqparatynda.
Sońǵy málimetter boıynsha, Qyzylorda oblysynda indetke shaldyqqandardyń jalpy sany 131-ge jetti. 4 adam jazylyp shyqty, 127-si em-dom qabyldaýda.
Mańǵystaý oblysynda COVID-19 Jańaózen qalasynyń 18 jastaǵy turǵynynan anyqtaldy.
«Ol koronavırýs ınfektsııasyn juqtyrǵan adammen qarym-qatynasta bolýyna baılanysty karantındik statsıonarǵa jatqyzylǵan bolatyn. PTR dıagnostıkalyq zertteý qorytyndysymen COVID-19 dıagnozy naqtylandy. Naýqastyń jaǵdaıy qanaǵattanarlyq. Bekitilgen hattamaǵa sáıkes tıisti em júrgizilýde. Onymen qarym-qatynasta bolǵan adamdar anyqtalyp, barlyǵy medıtsınalyq baqylaýǵa alynýda. Aýrý oshaqtarynda epıdzertteý jumystary, dezınfektsııalyq jumystar júrgizilýde», - delingen aqparatta.
Sońǵy derekter boıynsha, Mańǵystaý oblysynda ınfektsııa barlyǵy 12 adamnan anyqtaldy. Onyń ishinde 1-eýi jazylyp shyqty.
Qaraǵandy oblysynda koronavırýs ınfektsııasyn taǵy 2 adam juqtyrǵany belgili boldy. 47 jastaǵy áıel jáne 10 jasar bala Temirtaý qalasynyń turǵyndary. Buǵan deıin naýqas adammen jaqyn baılanysta bolǵan.
Pavlodar oblysynda indet 24 jáne 62 jastaǵy Pavlodar turǵyndarynan anyqtaldy. «Olar koronavırýs ınfektsııasy rastalǵan patsıentpen baılanysta bolǵan adamdar retinde karantındik statsıonarǵa buǵan deıin jatqyzylǵan edi. Eki patsıent de Meltser boksyna aýystyryldy. Baılanystaǵy adamdardyń sheńberi anyqtalady, olardy oqshaýlaý boıynsha jumystar júrgiziledi. Epıdemııaǵa qarsy is-sharalar jalǵasýda», - delingen coronavirus2020.kz-Telegram-ynda.