Koronavırýs: Omıkron nusqasy Delta shtamyna qaraǵanda juǵý jyldamdyǵy 36% joǵary

NUR-SULTAN. QazAqparat - Ońtústik Afrıkada koronavırýstyń jańa Omıkron nusqasynyń taralýy týraly derekterdi taldaý barysynda dárigerler onyń SARS-CoV-2 bastapqy nusqasynan eki ese juqpaly, al delta shtamynan 36% jyldam juǵady degen qorytyndy jasady. Taldaý nátıjesi medRxiv saıtynda jarııalandy.

Omıkron - koronavırýstyń jańa túri (B. 1.1.529). Ol Ońtústik Afrıka men Afrıkanyń basqa memleketteriniń aýmaǵynda osy jyldyń kúziniń sońynda tarala bastady. Qazir álemniń 80-nen astam memleketinde anyqtaldy. Ǵalymdardyń pikirinshe, Omıkron Delta shtamyna qaraǵanda áldeqaıda juqpaly, biraq ázirge dárigerler bul tujyrymdy tolyq rastaý úshin jetkilikti málimetter jınaǵan joq.

Jańa zertteýde Kolýmbııa ýnıversıtetiniń (AQSh) professory Djeffrı Shamannyń basshylyǵymen amerıkalyq dárigerler bul olqylyqtyń ornyn toltyrdy. Ǵalymdar Ońtústik Afrıkanyń Gaýteng provıntsııasyndaǵy sońǵy birneshe aptadaǵy málimetterdi taldady.

Osy derekterge súıene otyryp, zertteýshiler Ońtústik Afrıkada SARS-CoV-2 taralýynyń kompıýterlik modelin qurastyrdy. Onda jergilikti dárigerlerdiń ınfektsııany qanshalyqty jıi anyqtaǵany, PTR synaqtary jáne vırýs úlgilerine genomdyq taldaý júrgizilgeni eskerildi. Shaman men onyń áriptesteri pandemııanyń birinshi jáne keıingi tolqyndary kezinde COVID-19 qozdyrǵyshynyń qalaı taraǵanyn salystyrdy.