Koronavırýs: Nur-Sultandaǵy 7 naýqastan qandaı belgiler baıqaldy
NUR-SULTAN. QazAqparat - Nur-Sultan qalasy Qoǵamdyq densaýlyq saqtaý basqarmasynyń basshysy Sáýle Qısyqova 19 naýryz kúni anyqtalǵan 7 naýqas týraly aıtyp berdi, dep habarlaıdy QazAqparat tilshisi.
Olardyń bireýi 18 naýryzda ınfektsııa juqtyrǵan naýqaspen baılanysta bolǵan adam retinde statsıonarǵa túsken jáne 19 naýryzda óz boıynan da ınfektsııa tabylǵan.
«Aýrýhanaǵa túsken taǵy 6 naýqas ta jaqyn baılanysta bolǵandar tobynan. Olardyń úsheýinde tamaqtyń jybyrlaýy, qurǵaq jótel syndy belgiler baıqalǵan. Eki adamda sýbfebrıldi dene qyzýy bolǵan. Qazirgi ýaqytta barlyq naýqastardyń jaǵdaıy qanaǵattanarlyq. Dene qyzýy qalypqa tústi. Olardy dárimen emdeý dıagnostıkalaý men emdeýdiń klınıkalyq hattamasyna sáıkes júrgizilýde», - dedi basqarma basshysy qala ákimdiginde ótken onlaın brıfıngide.
Sáýle Qısyqovanyń aıtýynsha, sońǵy 7 oqıǵa boıynsha baılanysta bolǵan adamdar jáne otbasy músheleri anyqtalyp, 30 adam aýrýhanaǵa jatqyzylǵan. Baılanysta bolýy yqtımal adamdar úı karantınine jabyldy.
«Nur-Sultan qalasy boıynsha tirkelgen barlyq 25 jaǵdaı boıynsha jaqyn baılanysta bolǵan 244 adam Nur-Sultan men ózge óńirlerdegi aýrýhanalarǵa jatqyzyldy. 327 adam úı karantıninde jatyr, olarǵa kún saıyn medıtsınalyq mamandar habarlasyp turady», - dedi S. Qısyqova.
Buǵan deıin basqarma basshysy Nur-Sultanda kornavırýs juqtyrǵandardyń basym bóligi 30-49 jas aralyǵynda ekenin málimdegen edi.
Eske sala ketsek, Qazaqstanda qazir 49 koronavırýs ınfektsııasyn juqtyrǵan adam tirkelgen. Almatyda – 22 adam, Qaraǵandy qalasynda - 2 adam, Nur-Sultanda - 25 adam tirkelgen.
