Koronavırýs: Nur-Sultanda jappaı vaktsınatsııa qarqyn alyp keledi
NUR-SULTAN. QazAqparat - Elordada sáýir aıynan bastap qala turǵyndaryn ǵana emes elimizdiń ózge óńirlerinen kelgen azamattardy da jappaı vaktsınalaý bastaldy. Aı bastalǵaly shamamen 47 myń adam ekpe aldy. Sondaı-aq, vaktsınatsııaǵa turǵylyqty jeri bar, jumys isteıtin jáne QR aýmaǵynda turatyn sheteldikter de jiberildi, dep habarlaıdy QazAqparat.
El turǵyndaryn vaktsınatsııamen keńinen qamtý úshin Nur-Sultanda egý pýnkteriniń sany 36-dan 100-ge deıin artty. Bastapqy medıtsınalyq-sanıtarlyq kómek uıymdarynda ornalasqan olardyń jumys ýaqyty 8:00-den 24:00-ge deıin, saýda, oıyn-saýyq ortalyqtaryndaǵy egý pýnkteri úshin 10:00-den 22:00-ge deıin uzardy. Sondaı-aq, qalanyń eki iri «Mega Silk Way» jáne «Han Shatyr» SOSO-larda egý oryndary uıymdastyryldy.
Mysaly, bir aptada «Mega Silk Way»-da 1700-den astam adam vaktsınalandy.
Ekinshi saýda,oıyn-saýyq ortalyǵy — «Han Shatyrda» azamattardy jappaı vaktsınalaý búgin, 19 sáýirde bastaldy. Jaqyn arada mundaı pýnkter «Kerýen» SOSO men «Abý-Dabı Plaza» kesheninde de ashylady. Qajet bolǵan jaǵdaıda vaktsınatsııa pýnkterin qalanyń qonaqúılerinde de ashý josparda bar.
Halyqtyń COVID-19-ǵa qarsy vaktsına alý belsendiliginiń joǵary bolýyna baılanysty Qoǵamdyq densaýlyq saqtaý basqarmasy kóshpeli brıgadalar uıymdastyryp, eńbek ujymdaryn jappaı egýge kiristi. Túrli kásiporyndarda COVID-19 vaktsınasyn alǵysy keletinderdiń sany 1000 adamǵa jetedi.
Qala boıynsha búginge deıin barlyǵy 60 myńǵa jýyq adam vaktsınalandy.
