Koronavırýs: Nur-Sultanda 40 adam jansaqtaý bóliminde jatyr
NUR-SULTAN. QazAqparat – Elordanyń qoǵamdyq densaýlyq saqtaý basqarmasy basshysynyń orynbasary Gúlnaz Dosmyrzaeva qaladaǵy KVI naýqastarynyń sanyn aıtty, dep habarlaıdy QazAqparat.
«8 jeltoqsan kúni tańerteń qala boıynsha ınfektsııalyq statsıonarlarda 359 naýqas boldy, onyń ishinde jansaqtaý bóliminde - 40 adam. Ókpeni jasandy jeldetý apparatynda – 14 adam», - dedi Gúlnaz Dosmyrzaeva ákimdikte ótken brıfıngte.
Onyń aıtýynsha, juqpaly aýrýlar aýrýhanasyna jatqyzylǵan naýqastardyń sany ótken aılarmen salystyrǵanda azyraq.
Tıisinshe, KVI naýqastarynyń da 38%-ǵa, statsıonarlyq emdelip jatqandardyń – 27%-ǵa tómendegeni baıqalady.
Sondaı-aq, jedel medıtsınalyq járdem qyzmetine júginýler men shaqyrýlar sany 27%-ǵa azaıdy.
«Osyndaı jaqsy kórsetkishterge qaramastan, alǵashqy medıtsınalyq-sanıtarlyq kómek uıymdary koronavırýs ınfektsııasy bar patsıentterge úıde qyzmet kórsetýdi jalǵastyrýda. Mobıldi brıgadalar kúnine 1-1,2 myń ambýlatorlyq emdelýshilerdiń úılerine barady. Mýtatsııalanǵan vırýstyń aldyn alý jáne odan qorǵaý maqsatynda elordada halyqty koronavırýsqa qarsy vaktsınalaý jalǵasyp jatyr», - dep qorytyndylady dáriger.
