Koronavırýs: Nur-Sultan áýejaıynda 600-ge jýyq jolaýshy tekserilip jatyr
NUR-SULTAN. QazAqparat - Elordada Nursultan Nazarbaev atyndaǵy áýejaıǵa kelgen 600-ge jýyq jolaýshy oqshaýlandy. Bul týraly Nur-Sultan qalalyq qoǵamdyq densaýlyq saqtaý basqarmasynyń basshysy Sáýle Qısyqova aıtyp berdi, dep habarlaıdy QazAqparat.
«TJ rejıminiń engizilýine baılanysty, Nur-Sultan qalasyndaǵy Nursultan Nazarbaev atyndaǵy áýejaıǵa keletin barlyq jolaýshylardy oqshaýlaý týraly sheshim qabyldandy.
22 naýryzda 6 reıs arqyly - Dýbaı, Tokıo, Mınsk, Máskeý, London, Ystanbul qalalarynan 596 jolaýshy keldi. Onyń 577-si nemese 97 paıyzy koronavırýstyq ınfektsııaǵa zerthanalyq tekserý júrgizý úshin karantındik statsıonarǵa jatqyzyldy», - dedi basqarma basshysy «Habar 24» telearnasynda ótken brıfıngte.
Taldaý nátıjesi boıynsha olardy úı karantınine jiberý nemese ınfektsııa anyqtalǵan jaǵdaıda ınfektsııalyq statsıonarǵa jatqyzý týraly sheshim qabyldanady.
«Epıdemıologııalyq jaǵdaıy qolaısyz 1A sanatyndaǵy elderden kelgen 12 jolaýshy áýejaıdan dereý provızorlyq statsıonarǵa jiberildi. Osylaısha, Nur-Sultan qalasynyń turǵyndaryna shet elderderden kelgen jolaýshylardyń tekserýsiz qala aýmaǵyna kirmeıtinin aıtqymyz keledi», - dedi S. Qısyqova.
Aıta keteıik, Qazaqstan Respýblıkasy aýmaǵynda koronavırýs ınfektsııasyn juqtyrǵan jalpy 56 naýqas tirkeldi. Nursultan qalasynda 31 adamda koronovırýs ınfektsııasy anyqtaldy. Almaty qalasynda - 22 adam, Qaraǵandy qalasynda - 2, Almaty oblysynda 1 adam.
