Koronavırýs: Nur-Sultan ákimdigi azyq-túlik dúkenderi ıeleriniń mindetterin bekitti
Jedel shtab bul mindetterdi qalalyq ákimdiktiń resmı saıtynda jarııalady.
Jedel shtab, atap aıtqanda, azyq-túlik taýarlaryn satatyn azyq-túlik saýda jelileriniń, sýpermarketterdiń, shaǵyn marketterdiń, turǵyn úılerdiń janyndaǵy dúkenderdiń, saýda ortalyqtarynyń, saýda úıleriniń, bazarlar janyndaǵy azyq-túlik bólimderiniń menshik ıelerine birqatar mindet júktedi. Naqtyraq aıtqanda olar sanıtarııalyq jáne dezınfektsııalyq sharalardy mindetti saqtaı otyryp, shtattyq rejimde obektilerdiń úzdiksiz jumysyn júrgizýge mindettelgen. Sonymen qatar, qyzmetkerlerdi jeke qorǵanysh quraldarymen (medıtsınalyq betperdeler, perchatkalar jáne t.s.s), sanıtaızerlerdi ornatyp, áleýmettik mańyzy bar azyq-túlik taýarlaryna jáne birinshi qajettiliktegi taýarlarǵa baǵalardyń ósýine jol bermeýi tıis.
Sondaı-aq, bir qolǵa qant, kúrish, qaraqumyq sekildi ónimderdi 5 kelige deıin, kúnbaǵys maıyn 5 lıtrge deıin satylýyn shekteýi kerek. Odan bólek nan-toqash, kondıterlik ónimderdi, keptirilgen jemisterdi (jańǵaqtar, órikter, júzim jáne t.b.) qaptalǵan túrinde ótkizýdi qamtamasyz etýi kerek.
