Koronavırýs: Naýqastardy emdep jatqan dárigerler úılerine barmaıdy
NUR-SULTAN. QazAqparat - Elordada koronavırýs juqtyrǵan naýqastyń eń kishisi - 14, al úlkeni 59 jasta. Bul týraly Ortalyq kommýnıkatsııalar qyzmetindegi brıfıngte Nur-Sultan qalasy Qoǵamdyq densaýlyq saqtaý basqarmasynyń basshysy Sáýle Qısyqova aıtty, dep habarlaıdy QazAqparat tilshisi.
«Koronavırýs juqtyrǵan elordadaǵy 18 adam da Qazaqstan azamattary. Eń kishisi - 14 jasta, eki adamnyń jasy 59-da. Jalpy, vırýs juqtyrǵandardyń 70 paıyzy 30 ben 49 jas aralyǵyndaǵy azamattar. Barlyǵynyń jaǵdaıy jaqsy, dene qyzýlary qalypty. Qajetti emdeý sharalary jasalyp, medıtsınalyq kómek kórsetilip jatyr», - dedi ol BAQ ókilderiniń saýalyna oraı.
Sonymen qatar basqarma basshysy koronavırýs juqtyrǵan adamdardy emdep jatqan medıtsına qyzmetkerleri úılerine barmaıtyndyǵyn atap ótti.
«Infektsııa anyqtalǵan aýrýlar jatqan mekemedegi 60-tan astam dáriger men meıirbıkeler sol jerden shyqpaıdy. Ǵımarattyń bir bóliginde olarǵa jaǵdaı jasalǵan. Jumys ýaqyty bitken soń sol jerde demalyp, tamaqtanady. Sodan keıin kelesi aýysymǵa jumysqa túsedi. Bul indetke baılanysty qolǵa alǵan sharamyz», - dedi Sáýle Qısyqova.
