Koronavırýs: Naýqastar aýrýhanaǵa kóp jatqyzylǵan óńirler ataldy
NUR-SULTAN. QazAqparat – Qazaqstanda ınfektsııalyq tósek-oryndar eń kóp naýqas jatqan óńirler ataldy, dep habarlaıdy QazAqparat tilshisi.
QR DSM statsıonarlyq jáne statsıonardy almastyratyn medıtsınalyq kómek basqarmasynyń bas sarapshysy Baýyrjan Satybaldynyń aıtýynsha, vedomstvo ınfektsııalyq, reanımatsııalyq tósek-orynnyń qamtylýyna jáne KVI aýyr jáne óte aýyr naýqastar jaǵdaıyna monıtorıng júrgizedi.
«Qazirgi ýaqytta 317 medıtsınalyq nysanda barlyǵy 34 499 ınfektsııalyq tósek-oryn bar. Respýblıka boıynsha onyń 43%-ynda naýqastar jatyr. QR boıynsha ınfektsııalyq statsıonarlardaǵy reanımatsııalyq tósekter sany – 3074, onyń 35%-yna naýqastar bar. Ásirese Qyzylorda, Mańǵystaý oblystarynda jáne Nur-Sultan men Shymkent qalalarynda ınfektsııalyq tósek-orynda kóp naýqas baıqalady. Jansaqtaý bólimindegi tósek-oryn boıynsha – Nur-Sultan, Shymkent, BQO, Mańǵystaý oblystarynda naýqas kóp», - dedi spıker Ortalyq kommýnıkatsııalar qyzmetinde ótken baspasóz máslıhatynda.
Mamannyń aıtýynsha, bıylǵy shilde aıymen salystyrǵanda medıtsınalyq uıymdar sany 296-dan 317-ge deıin artqan.
«Epıdemıologııalyq ahýal nasharlaǵan jaǵdaıda KVI emdeý úshin el boıynsha qosymsha 60 myńǵa deıin ınfektsııalyq tósek jáne 6 myńǵa deıin reanımatsııalyq tósek daıyn», - deıdi B. Satybaldy.
