Koronavırýs: Nıý-Iorkte aýrýhanaǵa túsken adamdar sany ósti
NЬıÝ-IORK. QazAqparat – Sársenbi kúni Nıý-Iork qalasynyń gýbernatory Endrıý Kýomo koronavırýstyń taralýyn ustap turýǵa baǵyttalǵan shekteýlerdiń jańa paketin engizdi, sebebi shtatta aýrý juqtyrý jáne aýrýhanaǵa túsetin adamdar sany kúrt kóbeıgen, dep habarlaıdy QazAqparat France 24-qa silteme jasap.
Kýomo baılanys tizbegin baqylaý arqyly shtatta vırýstyń taralýyna adamdardyń túngi ýaqytta bar, meıramhana jáne sportzaldarda jınalýy negizgi sebep bolǵanyn anyqtady. Ol shyǵarǵan buıryq boıynshaǵ jabyq ǵımarattarda jumys istep júrgen barlyq barlar, meıramhanalar jáne trenajer zaldary saǵat 22:00-de jabylýy tıis, al is-sharalarǵa jınalatyndardyń sany 10 adamnan aspaýy kerek.
Málimdemede atap ótilgendeı, juma kúni kúshine enetin jańa sharalar Kalıfornııa men batystaǵy birneshe shtattyń koronavırýstyń tez taralýyn ustap qalý úshin shekteýlerdi qatańdatqanyna baılanysty boldy.
Nıý-Iork meri Bıll de Blazıonyń atap ótýinshe, jeti kúnde qala boıynsha koronavırýs testileriniń oń qorytyndyny anyqtaǵan kórsetkishi 2,52 paıyzdy qurady. Eger bul san 3 paıyzǵa jetse, el boıynsha eń iri memlekettik mektep júıesi syrttaı oqý úlgisine aýysady.
Osy arada, Qurama Shtattarda koronavırýs juqtyrý oqıǵalary sanynyń kóbeıýi, aýrýhanaǵa jatqyzý jáne ólim sanynyń ósimine baılanysty ekinshi tolqynnyń kóktemgi órshýden keıin pandemııany baqylaýǵa ala alǵan soltústik-shyǵys aýdandardy qamtı alatynynyń belgileri kóbeıgen.
Reuters taldaýyna sáıkes, seısenbi kúni Qurama Shtattarda 1450 ólim oqıǵasy tirkeldi, bul tamyz aıynan bastap eń joǵary kórsetkish bolyp tabylady.
AQSh-ta aýrý juqtyrý oqıǵalarynyń sany jeti kún qatarynan kóbeıip, seısenbi sońynda 136 myń adamǵa jetken, al aýrýhanaǵa jatqan adamdardyń sany pandemııa bastalǵaly alǵash ret 60 myń adamnan asty.
