Koronavırýs mýtatsııalana bastady: Jańa vırýsqa 20A.EU1 degen ataý berildi
NUR-SULTAN. QazAqparat - Eýropadaǵy koronavırýs ınfektsııasyn jańa juqtyrý jaǵdaılarynyń 80%-yna mýtatsııalanǵan koronavırýs sebep boldy.
Bul týraly aqparat QR Úkimeti janyndaǵy koronavırýstyń taralýyna jol bermeý jónindegi vedomstvoaralyq komıssııanyń Telegram kanalynda jarııalandy, dep habarlaıdy QazAqparat.
Kanaldyń habarlaýynsha, bul vırýs osy kóktemde jáne jazda búkil álemdi jaılaǵan vırýstan ózgeshe. Oǵan 20A.EU1 degen ataý berildi.
Gendik mýtatsııa Ispanııada maýsym aıynda paıda bolyp, Eýropaǵa oralǵan týrıstermen birge taraldy.
Ispan genetıgi Inakı Komas vırýstyń taralýy koronavırýs ınfektsııasyn juqtyrǵan adamdardyń buqaralyq is-sharaǵa qatysýynan bastaldy dep boljaıdy.
Ǵalymnyń boljamynsha, vırýstyń odan ári tez taralý sebebi Ispanııada demalyp jatqan azamattardyń qaýipsizdik sharalaryn saqtamaýymen baılanysty bolyp otyr.
Mýtatsııalanǵan vırýstyń taraý jyldamdyǵy jáne onyń qanshalyqty qaýipti ekeni ázirge belgisiz. Buǵan deıin, AQSh-ta osydan da agressıvti, D614G dep atalǵan, SARS-CoV-2-niń mýtatsııasy anyqtaldy.
