Koronavırýs muǵalimderdiń róli men mańyzyn aıqyndap berdi – Ashat Aımaǵambetov
«Biliktiligi joǵary, bedeli myqty, qoǵamda qurmetke bólengen muǵalimdersiz memlekettiń jarqyn bolashaǵyn elestetý qıyn. Sebebi ekonomıkanyń, mádenıet pen tutastaı qoǵamnyń damýy sizderdiń eńbekterińizdiń nátıjesine tikeleı baılanysty. Ustaz bolý – júrektiń tańdaýy, jannyń qalaýy. Bul jumys asqan jankeshtilik, zor shydamdylyq pen balalarǵa degen mahabbatty talap etedi.Elimizdiń betke ustar azamattaryn tárbıelep, jaýapkershiligi mol jáne abyroıly mindetti atqaryp júrsizder. Oqýshylaryńyzdyń jeńisterine qýanyp, sátsizdikterine birge qynjylasyzdar, qınalǵan shaqtarynda qoldaý kórsetesizder», - dep jazdy mınıstr facebook paraqshasyna .
Mınıstr ár ustazdyń elimizdiń damýyna qosyp otyrǵan úlesin memlekettiń asa joǵary baǵalaıtynyn jetkizdi. Onyń birden bir dáleli – «Pedagog mártebesi týraly» Zańnyń qabyldanýy.
«Osy Zańnyń qabyldanýy, shyn máninde, elimiz úshin asa mańyzdy boldy, sondyqtan Memleket basshysynyń ustazdar qaýymyna kórsetken qoldaýy úshin alǵysymyz sheksiz. Zańda muǵalimderdiń tek áleýmettik kepildikteri ǵana emes, sonymen qatar quqyqtary men mindetteri de resmı túrde bekitilgen. Búgingi tańda ustazdar qaýymy artyq eseptilik pen qyzmetine jatpaıtyn fýnktsııalardan zań júzinde bosatyldy. Zańdaǵy normalardyń múltiksiz iske asyrylýy qamtamasyz etilýi tıis», - deıdi A. Aımaǵambetov.
Sondaı-aq muǵalimderdiń jalaqysy da aıtarlyqtaı artty. Synyp jetekshiligi men dápter teksergeni úshin tólenetin qosymsha aqynyń mólsheri eki ese ósti.
«Pedagogıkalyq sheberlik biliktiligi úshin tólenetin qosymsha aqy da laýazymdyq jalaqysynyń 30-50%-y mólsherinde belgilenip otyr. Magıstr dárejesi bar muǵalimderge aı saıyn 27 myń kóleminde qosymsha aqy qarastyrylǵan. Alǵash ret bilim berý uıymdarynyń dırektorlary men orynbasarlaryna da basqarýshylyq sheberligi úshin laýazymdyq jalaqysynyń 30-dan 100 %-ǵa deıin qosymsha aqy bekitildi», - dep túsindirdi mınıstr.
Budan bólek, Zańda muǵalimderdiń jumys ýaqyty men demalys ýaqyty, júktemeleriniń azaıýy jáne basqa da áleýmettik qoldaý sharalary naqty kórsetilgen.
«Bala zor yqylaspen bilim alyp, jan-jaqty damýy kerek. Biz balalarymyzdyń mektep partalaryna qaıta oralýyn qalaımyz. Muǵalim mamandyǵynda ýaqyt talabynan qoryqpaıtyn, óz shákirtterine úlgi bola biletin adamdar ǵana jumys isteıdi. Koronavırýs pandemııasy ýaqyttyń syn-qaterine ilesip qana qoımaı, osyndaı kezeńde kóshbasshylyq qasıetke ıe bolýdyń qanshalyqty mańyzdy ekenin kórsetti. Osynaý kúrdeli kezeń muǵalimderdiń qoǵamdaǵy róli men mańyzyn taǵy bir aıqyndap berdi. Barshańyzǵa osy qıyn mindetti abyroımen atqaryp jatqandaryńyz úshin jáne qoldaý bildirip otyrǵandaryńyz úshin alǵys aıtamyn. Biz muǵalimderdiń quqyqtary men múddelerin qorǵaýǵa, áleýmettik kepildikterdi arttyrýǵa, osy mamandyqqa eń laıyqty túlekterdi tartýǵa baǵyttalǵan jumysymyzdy odan ári jalǵastyratyn bolamyz. Mereke kúni barshańyzǵa zor densaýlyq, otbasylaryńyzǵa bereke, shyǵarmashylyq tabystar tileımin! Jaqyndaryńyzdyń yqylasy men qurmetine bólene berińizder!», - dedi Bilim jáne ǵylym mınıstri.
Aıta keteıik, Qazan aıynyń alǵashqy jeksenbisinde Qazaqstanda muǵalimderdiń kásibı merekesi atap ótiledi.
