Koronavırýs: Mońǵolııada joǵary ázirlik rejımi mamyr aıyna deıin uzartyldy

ULANBATYR. Montsame-QazAqparat – Mońǵolııa eliniń mınıstrler kabıneti joǵary ázirlik rejımin taǵy bir aıǵa uzartý jóninde sheshim qabyldady, dep habarlaıdy QazAqparat Montsame aqparat agenttigine silteme jasap.

25 naýryz kúni eldiń Mınıstrler kabıneti kezekten tys otyrys ótkizip, sonyń barysynda joǵary ázirlik rejıminiń merzimin taǵy bir aıǵa uzartý sheshimin qabyldady.

Mońǵolııa vıtse-premeri, Memlekettik tótenshe komıssııanyń basshysy S. Amarsaıhan eldegi qazirgi jaǵdaı jáne koronavırýsqa qarsy kúres jedel sharalary týraly málimet berdi.

Otyrysta sondaı-aq 5,9 mlrd týgrık kólemindegi bıýdjet jobasy talqylanyp, qabyldandy.

Bul qarajat vaktsınalaý naýqanyn belsendirý jáne turǵyndar arasynda koronavırýs juqtyrýdyń kúrt kóterilgen deńgeıin azaıtýǵa, sondaı-aq qazirgi joǵary ázirlik rejıminiń merzimin taǵy bir aıǵa, ıaǵnı 31 naýryzdan 30 sáýirge deıin uzartý jobasyn iske asyrýǵa jumsalmaq.

Kásibı organdardaǵy 25 mamannan quralǵan jumys tobynyń qaýip deńgeıin kezekti 22-shi baǵalaý qorytyndylaryna sáıkes, elde ınfektsııa qaýpiniń deńgeıi «óte joǵary».

Budan basqa, Mınıstrler kabıneti Úkimettiń memlekettik shekaradan ótkizý beketterine qatysty sharalar týraly qaýlysyna ózgerister engizdi.

Osylaısha, onyń qyzmetiniń merzimi de bir aıǵa uzartyldy.

Bul rette 14 ótkizý beketi arqyly júk tasymaly 1 mamyrǵa deıin qalypty rejımde júzege asyrylady, al jolaýshylar qozǵalysy jabylady.

Jolaýshylar shekaradan tek Memlekettik tótenshe komıssııanyń ruqsatymen ǵana óte alady.