Koronavırýs: Mońǵolııada oqýshylarǵa sabaq telearnalar arqyly oqytylady

ULANBATYR. Qazaqparat - Mońǵolııada oqýshylarǵa telearnalar arqyly sabaq oqytylady, dep habarlaıdy QazAqparat tilshisi.

Qytaı Halyq Respýblıkasynyń Ýhan qalasynda týyndaǵan koronovırýstyń qarqyndy taralýyna baılanysty kórshiles Mońǵolııada bilim berý mekemeleriniń jumysys toqtatylyp, saqtyq sharalary kúsheıtildi.

Qazirgi tańda osy elde barlyq mektep, balabaqsha, kásiptik bilim berý mekemeleri men joǵarǵy oqý oryndary 2 naýryzǵa deıin jabylyp, buqaralyq sharalardyń uıymdastyrylýyna tyıym salynyp otyr.

Osy ýaqyt aralyǵynda oqýshylarǵa eldegi iri 18 telearna arqyly 1-12 synyptyń sabaǵyn oqý baǵdarlamasyna sáıkes úıretiletindigin sol eldiń Bilim jáne ǵylym, sport mınıstri E.Baatarbıleg málimdedi.

«Barlyǵy 402 ret júriletin telesabaqtyń jalpy aýqymy 6 357 mınýtty, 40 pándi qamtıdy. Ol úshin eń úzdik degen 170 muǵalim daıyndalyp jatyr. Kúnine 2-4 pán árqaısysy 10-20 mınýttan úıretiletin bolady», dedi mınıstr eldegi BAQ ókilderine arnap jasaǵan málimdemesinde.

Telesabaq aqpan aıynyń 3-inen bastap el kóleminde telearnalar arqyly taratyla bastaıdy.

Avtory Nurbolat Ónerhanuly