Koronavırýs: Mılannan ushyp kelgen 7 jolaýshy Tbılısıde ınfektsııalyq aýrýhanaǵa jetkizildi
TBILISI. Novostı Grýzıı -QazAqparat – Mılannan Tbılısıge ushyp kelgen 7 jolaýshy áýejaıdan Grýzııa astanasyndaǵy juqpaly aýrýhanaǵa jetkizildi, dep habarlaıdy QazAqparat Novostı-Grýzıı saıtyna silteme jasap.
Áýejaıda tekserý kezinde olardyń dene qyzýy kóterilgeni belgili boldy. Keıin jedel medıtsınalyq kómektiń arnaıy toby olardy emhanaǵa aparǵan.
Dárigerlerdiń aıtýynsha, patsıentterdiń densaýlyq jaǵdaıy qanaǵattanarlyq. Zertteýlerdi nátıjesi boıynsha erekshe ózgerister baıqalmaǵan.
«Patsıentterdiń jaǵdaıy qanaǵattanarlyq. Birneshe adamnyń dene qyzýy 37 gradýsqa jetken. Tamaq aýrýy jáne qurǵaq jótel bolmasa densaýlyq jaǵdaıynyń qıyn ekenin aıtyp shaǵymdanǵandar joq. Olardyń test nátıjeleri kúnniń ekinshi jartysynda belgili bolady», — dep málimdedi emhananyń dárigeri Aleksandr Gogınava jýrnalısterge.
Grýzııalyq basylymnyń málimetinshe, Tbılısıdiń juqpaly aýrýlar aýrýhanasynyń bokstalǵan palatalarynda 25 patsıent jatyr.
Dárigerlerdiń aıtýynsha, olardyń barlyǵynyń densaýlyq jaǵdaıy jaqsy. Koronavırýsqa áli 11 adam tekserilmegen. Olardyń test nátıjeleri kúnniń sońyna deıin belgili bolýy kerek.
Koronavırýs juqtyrǵany rastalǵan úsh patsıenttiń jaǵdaıyna keletin bolsaq, dárigerlerdiń aıtýynsha, olardyń aýrýy aýyrtpashylyqtar týdyryp otyrǵan joq.
«Osy kezeńde olarda asqynǵan eshteńe joq, baqylaý jáne zertteý kezeńinde. Patsıentterdiń dene qyzýy – 37.3 gradýs, ıaǵnı tómen deńgeıde. Ázirge olar aýrýhanadan shyǵarylmaıdy, biraq naýqastardyń jaǵdaıy qanaǵattanarlyq, asqynady dep oılamaımyz», - dep málimdedi Gogınava.
3 naýryzda koronavırýs jaǵdaıy Grýzııada úsh adamnan, onyń ishinde Iranda bolǵan eki er adamnan, sondaı-aq Italııadan kelgen bir áıelden anyqtalǵan.
El úkimeti 2 naýryzdan bastap balabaqshalar men mektepterde eki aptalyq demalys jarııalady. Grýzııanyń Densaýlyq saqtaý mınıstrligi elde koronavırýstyń úshinshi jaǵdaıy tirkelýine baılanysty oqý oryndarynda dezınfektsııa júrgizýdi usyndy.
Koronavırýspen kúres jónindegi vedomstvoaralyq úılestirý keńesi halyq kóp jınalatyn oryndarda vırýstyń taralýyn aldyn alý maqsatynda sharalardy ótkizbeýge usynys jasady. Keıbir vedomstvolar, kompanııalar men uıymdar qashyqtyqtan jumys isteýge kóshken.
Avtor: Anton Gagarın
Foto: newstbilisi.info
