Koronavırýs: Mılannan kelgen qazaqstandyqtyń jaı-kúıi qalaı
NUR-SULTAN. QazAqparat – Nur-Sultan qalasy qoǵamdyq densaýlyq saqtaý basqarmasynyń basshysy Sáýle Qısyqova koronavırýs ınfektsııasy tabylǵan qazaqstandyq naýqastyń jaı kúıi týraly aıtyp berdi, dep habarlaıdy QazAqparat tilshisi.
Buǵan deıin QR Densaýlyq saqtaý mınıstri Eljan Birtanov koronavırýs juqtyrǵan úshinshi adamnyń elordada anyqtalǵanyn habarlady.
«Qazaqstandyq áıel 12 naýryz kúni Mılan-Máskeý-Nur-Sultan reısinen túsirildi. Sebebi, Italııa koronavırýstyq ınfektsııa qaýpi boıynsha birinshi sanatqa engizilgen. Osyǵan baılanysty keshe tańǵy 8:25-te QR azamaty reısten túsirilip, bizdiń statsıonarǵa jetkizildi. Qazir ol Nur-Sultan qalasyndaǵy kópbeıindi medıtsınalyq ortalyqtyń karantındik statsıonarynda jatyr», - dedi S. Qısyqova Ortalyq kommýnıkatsııalar qyzmetinde ótken baspasóz máslıhatynda.
Koronavırýstyq ınfektsııany dıagnostıkalaý men emdeý hattamasyna sáıkes, áıelden bıomaterıal alynyp, Ulttyq saraptama ortalyǵynyń vırýsologııalyq zerthanasyna jiberilgen.
«Búgin zerthana nátıjesin aldyq jáne qazaqstandyq áıelden koronavırýstyq ınfektsııa tabyldy. Qazirgi ýaqytta naýqas densaýlyǵyna esh shaǵym túspedi, biraq ınfektsııa tabylǵandyqtan, emdeý sharalary bastaldy. Ol jeldetkishi bar bir adamdyq palatada jatyr», - dedi basqarma basshysy.
Sondaı-aq, qazaqstandyq áıelmen bir ushaqta 90 jolaýshy bolǵan. Nur-Sultan qalasynyń Densaýlyq saqtaý basqarmasy olarǵa habarlasyp jatyr.
