Koronavırýs: Mańǵystaýlyq kásipkerler «Ashyq» jobasyna qatysa bastady
Oblystyń óńirlik kásipkerler palatasy dırektorynyń orynbasary Aqqý Aıtjanovanyń aıtýynsha, bul joba koronavırýs ınfektsııasynyń kásipkerlik sýbektilerde taralý qaýpin tómendetedi.
«Jobanyń artyqshylyǵy — qaýipsizdik. Qazirgi ýaqytta bıznes karantındik shekteýlermen jumys isteıdi. «Ashyq» mobıldik qosymshasy QR kodyn paıdalaný jáne jalpy PTR málimetter bazasymen ıntegratsııalaý arqyly kelýshiniń mártebesin anyqtaýǵa múmkindik beredi. Osylaısha, jobaǵa qatysýshylar qabyldanǵan sanıtarlyq sharalarǵa qosymsha baqylaýdy júrgize alady», - dedi Aqqý Aıtjanova.
QR kody kásipkerlik sýbektisine beriledi. Jobaǵa qatysatyn kásipkerler ózderiniń QR-kodtaryn InfoKazakhstan.kz platformasy arqyly ala alady. QR-kod azamat týraly málimetti 4 túspen kórsetedi: jasyl, kók, sary jáne qyzyl.
«Kelýshi telefonyna «Ashyq» mobıldik qosymshasyn júktep, telefon nómirimen tirkeledi, JSN engizip, mekemeniń QR kodyn skanerleıdi. Sondaı-aq, shyǵý kezinde de QR kodyn skanerleý kerek. Mobıldi qosymshadan QR-kodty skanerlegennen keıin kelýshiniń mártebesi tústi formatta janady, ol adamnyń indetti juqtyrǵandyǵyn nemese juqtyrmaǵandyǵyn kórsetedi», - dedi Mańǵystaý oblysy saýda jáne kásipkerlik basqarmasy basshysynyń orynbasary Muqanbetjan Kóbegen.
Óńirimizde karantın sharalary jeńildetilgennen bastap kásipkerlik sýbektilerdiń 75% nemese 650 kásipkerlik sýbektisi karantın talaptaryn saqtaı otyryp jumysyn bastady. Mańǵystaý oblysynda qyzmet kórsetý salasynda 185-ke jýyq kásipkerlik sýbektisi bar.
Bul jobanyń bir ereksheligi, eger óńir «qyzyl» aımaqta ornalassad a «Ashyq» jobasyna qatysýshy kásipkerlik sýbektileri jumysyn júrgize beredi.
Aıta keteıik, búginde «Ashyq» pılottyq jobasyna birneshe óńirdiń kásipkerleri qosyldy. QR DSM Sanıtarlyq-epıdemıologııalyq baqylaý komıtetiniń tóraıymy Aıjan Esmaǵambetova joba talaptaryn oryndamaǵan nysandar jobadan shyǵarylatynyn málimdedi.