Koronavırýs: Mańǵystaýda ınfektsııalyq statsıonarlarda 50 naýqas jatyr

AQTAÝ. QazAqparat - Mańǵystaýda 15 qazan kúngi jaǵdaı boıynsha 50 adam koronavırýs ınfektsııasymen aýyryp, karantındik statsıonarda jatyr, dep habarlaıdy QazAqparat tilshisi oblystyq kommýnıktsııa ortalyǵyna silteme jasap.

Aýrýhanaǵa túsken naýqastyń 44-i koronavırýstyq pnevmonııaǵa shaldyqqan. Qalǵan 6 naýqastyń koronavırýsqa tapsyrǵan synamasy oń nátıje kórsetken.

«Qazirgi ýaqytta jansaqtaý bóliminde 4 naýqas jatyr. Onyń 2-niń jaǵdaıy aýyr, taǵy 2 naýqas óte aýyr hálde dep baǵalanýda. Bul bólimge túskenderdiń nasharlaýyna jedel tynys jetispeýshiligi jáne ilespe aýrýlardyń bolýy sebep», - delingen habarlamada.

Búginde aımaqtyń oqshaýlaý oryndaryndaǵy tósek-oryn júktemesi 23 paıyzdy quraıdy. Oblys kóleminde 215 ınfektsııalyq І-ІІ satyly tósek oryn bar. Sondaı-aq, reanımatsııalyq tósek sany 43. Anyqtamasyz shetelden kelgen Qazaqstan Respýblıkasynyń azamattary men shetel azamattaryna arnalǵan karantındik statsıonarlarda barlyǵy 270 tósek oryn bar.

Al, buǵan deıin oblystyń bas sanıtar dárigeri Ǵazız Nadýev Mańǵystaý oblysynda koronavırýsqa shaldyqqandar sany artatyn bolsa, karantın talaptary kúsheıtiletinin málim etken edi.