Koronavırýs: Mańǵystaý oblysynda 5 naýqas jansaqtaý bóliminde jatyr

AQTAÝ. QazAqparat - Mańǵystaý oblysynda 11 qazan kúngi jaǵdaı boıynsha, koronavırýs ınfektsııasymen statsıonarda jatqan naýqastardyń sany – 57, dep habarlaıdy QazAqparat tilshisi.

Qoǵamdyq kommýnıkatsııa ortalyǵynyń aqparatyna sáıkes, 57 naýqastyń 49-y aýrýhanaǵa – koronavırýstyq pnevmonııa, 8-i COVID-19 dıagnozymen jatqyzylǵan.

Oblystyq densaýlyq saqtaý basqarmasynyń málimetinshe, jansaqtaý bóliminde 5 naýqas jatyr. Onyń ishinde 3-eýi – aýyr, 2-eýi – óte aýyr jaǵdaıda. Jansaqtaý bólimindegi naýqastardyń jaǵdaıy tynys alýdyń jetispeýshiligi men ilespe aýrýlardan órshigen.

Aıta keteıik, oblys kóleminde 215 ınfektsııalyq І-ІІ satyly tósek oryn bar. Sondaı-aq, reanımatsııalyq tósek sany 43-ke deıin kóbeıtildi.

Koronavırýstyń joqtyǵyn rastaıtyn anyqtamasyz shetelden kelgen Qazaqstan Respýblıkasynyń azamattary men shetel azamattaryna arnalǵan Aqtaý qalasynda – 15, Jańaózen qalasynda – 100, Qaraqııa aýdanynda – 10, Beıneý aýdanynda 10 tósek-oryndy karantındik statsıonarlar ashyldy.