Koronavırýs: Qyzylordada medıtsınalyq betperde tapshylyǵy joq
Oblystyq taýarlar men kórsetiletin qyzmetterdiń sapasy men qaýipsizdigin baqylaý departamentiniń mamandary osyndaı málimdeme taratty, dep habarlaıdy QazAqparat tilshisi.
Sońǵy ýaqytta Qytaıda koronavırýstyń shyǵýyna baılanysty aımaqta barlyq qaýipsizdik sharalaryna nazar aýdarylyp otyr. Osy maqsatta departament mamandary medıtsınalyq betperdelerdiń oblystyq dárihanalarda bolýyna kún saıyn monıtorıng júrgizip keledi. Búgingi kúni Qyzylorda oblysynyń dárihanalyq qoımalary jáne dárihanalarynda onyń 165 myńnan astam qory bar.
«Sońǵy ýaqytta turǵyndar tarapynan oǵan suranys kúrt artty. Sol sebepti farmatsevtıkalyq uıymdar arqyly oǵan qosymsha suranys jasaldy. Qazirge deıin onyń jartysyna jýyǵy jetkizildi. Departament óz quzyreti sheginde tek dárilik zattardyń baǵasyn memlekettik retteýdi júzege asyrady. Betperdeler medıtsınalyq buıym, sondyqtan onyń baǵasy memleket tarapynan rettelmeıdi. Osy oraıda turǵyndarǵa dárihanalarda betperdeniń bolmaýyna qatysty dabyl qaǵýǵa eshqandaı negiz joq ekendigin habarlaımyz», - dedi Qyzylorda oblysynyń taýarlar men kórsetiletin qyzmetterdiń sapasy men qaýipsizdigin baqylaý departamentiniń bólim basshysy Nurbek Ádilhanov.
Foto: Vladımır Smırnov/TASS