Koronavırýs: Qyzylordada ınfektsııalyq aýrýhananyń qurylysy aıaqtalýǵa jaqyn
QYZYLORDA. QazAqparat - Qyzylorda oblysynda koronavırýspen kúres baǵytynda qajetti is-sharalar júzege asyp keledi, dep habarlaıdy QazAqparat tilshisi.
Qazir oblysta koronavırýs ınfektsııasyna baılanysty jaǵdaı turaqty. Medıtsınalyq uıymdar shtattyq rejımde jumys isteýde.
Aımaqta 3500 medıtsına qyzmetkeriniń rezervi jasa lǵan.
Qyzylorda qalasynda 200 adamǵa arnalǵan modýldik juqpaly aýrýlar aýrýhanasynyń qurylysy júrgizilýde.
Kópbeıindi oblystyq aýrýhanada jáne Qazaly aýdanaralyq aýrýhanasynda demeýshiler esebinen ottegi stantsııasy salynýda.
«Tez soǵylatyn modýldi ınfektsııalyq aýrýhananyń qurylysy jaqynda aıaqtalady. Onda naýqastardyń em alýyna tolyq jaǵdaı jasalady. Emdeý ornynda jergilikti dárigerler qyzmet atqarady», - deıdi oblystyq densaýlyq saqtaý basqarmasynyń basshysy Sábıt Pazylov.
Jyl basynda oblysta ókpeni jasandy jeldetý (ÓJJ) apparatynyń sany 76 bolǵan edi. Qazirgi tańda onyń sany 244 danaǵa jetti.
Oblystyq densaýlyq saqtaý basqarmasynyń málimetinshe, aımaqta koronavırýs derti asqynǵan jaǵdaıda 21 ınfektsııalyq jáne provızorlyq emdeý orny qaıta ashylady. Jalpy sany - 3 myń oryn.
Aımaqta medıtsınalyq qural-jabdyqtarmen qamtamasyz etý deńgeıi artyp keledi. Jergilikti bıýdjetten 4 flıýro jáne 6 dana statsıonarly rentgen apparatyn satyp alý josparlanýda.
Shilde aıynan bastap emhanalar deńgeıinde qala, aýdan ákimdikterimen birlesip, úı jaǵdaıynda dárigerlik jáne dınamıkalyq baqylaýdy qajet etetin 161 mobıldi brıgada uıymdastyryldy.
Onyń árbiri 5 myń adamǵa qyzmet kórsetti. Brıgadalardyń 38-i qalada bolsa, 28-i aýdan ortalyqtary jáne 95-i eldi mekende jumys jasady.
Jedel járdem qyzmetine jergilikti bıýdjet esebinen lızıng arqyly tolyǵymen jabdyqtalǵan 40 jedel járdem reanımobıli jetkizildi.
Odan bólek, 2 jyljymaly medıtsınalyq keshen kilti Jalaǵash, Qarmaqshy aýdandyq aýrýhanalaryna tapsyryldy.
Qyzylorda oblysynda koronavırýs jáne vırýstyq pnevmonııa boıynsha naýqastardy emdeýmen aınalysqan jergilikti medıtsına qyzmetkerlerine tıisti ústeme aqy tólendi.
Qyzylorda oblysynda naýryz-qarasha aılarynda osy maqsatta tıisti jumystardy atqarý barysynda erekshe belsendilik kórsetken 15 082 qyzmetkerge 2 834 643,3 teńge tólendi.
Onyń ishinde qarasha aıynda aımaqtyń 825 medıtsına qyzmetkerine jalpy somasy 138 734,4 myń teńge ústeme aqy berildi.
Óńirdiń medıtsınalyq qyzmetkerlerge ústemeaqyǵa áleýmettik medıtsınalyq saqtandyrý qorynan 2 mlrd teńgeden astam qarajat bólindi.
