Koronavırýs: Qyzylorda oblysynyń ákimi turǵyndarǵa úndeý jasady

QYZYLORDA. QazAqparat - Qazaqstan óńirlerindegi epıdemıologııalyq ahýaldy baǵalaý matrıtsasy boıynsha 15 shildede Qyzylorda oblysy «qyzyl» aımaqqa kirdi. Osyǵan oraı oblys ákimi Gúlshara Ábdiqalyqova óńir jurtshylyǵyna úndeý jarııalady, dep habarlaıdy QazAqparat tilshisi.

Úndeýde o blys ákimi bıyl da indetpen aýyrǵandar kúnnen kúnge toqtaýsyz kóbeıip jatqanyna nazar aýdardy.

«Bizdiń beıǵamdyǵymyz ben karantınniń qarapaıym talaptaryn saqtaýǵa salǵyrttyǵymyzdyń kesiri ózimizge ǵana emes, otbasymyz ben týystarymyzǵa, aınalamyzdaǵy adamdarǵa tııýde.

Búgingi kúni oblysta barlyǵy koronavırýs ınfektsııasynyń 7783 jaǵdaıy tirkelip, 100 myń halyqqa shaqqandaǵy aýrýshańdyq kórsetkishi 946,4-ti qurap otyr.

Barlyq tirkelgen koronavırýs ınfektsııasynyń 2,0 paıyzy syrttan tasymaldanǵan, 58,0 paıyzy skrınıngtik tekserý nátıjesinde jáne 40 paıyzy qarym-qatynas arqyly juqtyrǵandar.

Aýrýǵa jańa týǵan náresteler men qarııalar da shaldyqsa, sonyń ishinde 20 jastan 69 jas aralyǵyndaǵy azamattar arasynda belsendilik baıqalýda.

Bul jumysqa belsendi azamattar arasynda kóp degen sóz.

Qadirli jerlesterim, densaýlyǵymyz aldymen ózimizge kerek ekenin ózderińiz de jaqsy bilesizder. Іndetke toqtam bolýy úshin, tezirek mamyrajaı jaqsy kúnge jetýimiz úshin sizderden jıyn-toı, as berý, týrıstik saıahat, otbasylyq kópshilik sharalardy toqtata turýdy jáne karantınniń qarapaıym talaptaryn (maska kııý, antıseptık quraldary, araqashyqtyqty saqtaý) qatań saqtaýdy, ekpe alýdy suraımyn», - delingen úndeýde.

Aıta ketsek, Qyzylordada 193 myńnan astam adam koronavırýsqa qarsy vaktsına saldyrdy.