Koronavırýs: Qyzylorda oblysynda turǵyndardyń 73 paıyzy vaktsına aldy

QYZYLORDA. QazAqparat - Qyzylorda oblysynda ekpe qabyldaýǵa qabiletti turǵyndardyń 73,2 paıyzy vaktsınanyń birinshi komponentin saldyrdy, dep habarlaıdy QazAqparat tilshisi.

Sońǵy kúnderi oblystaǵy sanıtarlyq epıdemıologııalyq ahýaldyń turaqtalǵany baıqalady. Degenmen saqtyq sharalaryna salǵyrt qaraýǵa áli erte.

Pandemııa bastalǵaly beri óńirde koronavırýs ınfektsııasymen 17 403 naýqas tirkelgen. Olardyń 92 paıyzy dertten tolyq emdelip shyqty.

«Qazirgi tańda oblys azamattaryn vaktsınatsııalaý jumystary jalǵasyn tabýda. 1 aqpan men 19 qyrkúıek aralyǵynda aımaqta vaktsınatsııanyń 1 komponentimen egilgender sany - 294 178. Al 247 689 adam ekpeniń eki komponentin de alǵan, - dedi oblystyq densaýlyq saqtaý basqarmasy basshysynyń orynbasary Jangeldi Shaımbetov.

Oblysta ekpe qabyldaýǵa qabiletti 401 myń adam bar dep eseptelgen.

Aıta ketý kerek, Qyzylorda oblysy boıynsha 20 medıtsınalyq mekemede koronavırýs ınfektsııasyna qarsy egý jumystary júrgizilýde.

Eske salsaq, Qyzylorda oblysynda 3 607 nysan «Ashyq» júıesine qosylǵan.