Koronavırýs: Qyzylorda oblysynda dárihanalarǵa 7,9 mln teńge aıyppul salyndy
QYZYLORDA. QazAqparat – Qyzylorda oblysynda dári-dármek qory jetkilikti. Bul maqsatta taǵy 56 mln teńgege dárilik preparattar qosymsha jetkiziledi, dep habarlaıdy QazAqparat tilshisi.
Pandemııa kezeńinde oblysta 5 mıllıon qaptama kóleminde medıtsınalyq preparattar satyp alyndy. Olardyń qatarynda ystyq túsiretin dáriler, antıbıotıkter, vırýsqa qarsy preparattar, ımmýnostımýlıatorlar, medıtsınalyq buıymdar, ınektsııalyq preparattar bar. Aldaǵy ýaqytta 56 mıllıon teńgege taǵy da dári-dármek alynady.
Oblystyq medıtsınalyq jáne farmatsevtıkalyq baqylaý departamenti óńirlerdegi kóterme dıstrıbıýtorlar men dárihanalarda suranysqa ıe dárilik zattar men medıtsınalyq buıymdardyń tolyq qamtylýyna turaqty monıtorıng júrgizýde. Bıylǵy jyldyń 15 shildesi men 9 jeltoqsany aralyǵynda kóterme saýda qoımalary men dárihanalarda dárilik zattar qory kóbeıdi. Atap aıtqanda, antıbıotıkter – 2,2, vırýsqa qarsy preparattar – 2,3, antıkoagýlıanttar – 2,4, ystyqty túsiretin preparattar – 3,7, medıtsınalyq maskalar – 1,5 esege artty.
«Monıtorıng nátıjesinde 159-dan astam dárihana qamtylyp, shekti baǵadan asyrylyp satylǵan dárilik zattardyń 72 ataýy anyqtaldy. Kórsetilgen kezeńde olarǵa 5,2 mln teńge aıyppul salyndy. Shekti baǵadan asyp ketýdiń 33, dárilik zattardy zańsyz ótkizýdiń 17 deregi anyqtaldy. Ákimshilik quqyq buzýshylyq týraly 91 hattama toltyrylyp, 7,9 mln teńge aıyppul salyndy. Zańsyz aınalymnan 448 ataýdaǵy dárilik zat pen 36 ataýdaǵy medıtsınalyq buıym alyndy», - dedi oblystyq medıtsınalyq jáne farmatsevtıkalyq baqylaý departamentiniń bólim basshysy Nurbek Ádilhanov.
Óńirde 10 farmatsevtıkalyq uıym nesıe aldy. Olardyń 5-eýi aýdanda bolsa, 5-eýi qalada ornalasqan. Sonymen qatar, kredıtteýge 13 farmatsevtıkalyq uıym qujatyn jınaqtaýda.
Esterińizge sala ketelik, 11 jeltoqsannan bastap Qyzylorda oblysynda karantın talaptary jeńildetiledi.
