Koronavırýs: Qyzylorda oblysynda 520 adam vaktsına saldyrdy
QYZYLORDA. QazAqparat - Qyzylorda oblysynda aqpan aıynyń basynan beri 520 adam vaktsına saldyrdy, dep habarlaıdy QazAqparat tilshisi.
Olardyń arasynda medıtsına qyzmetkerleri, ekpe saldyrýǵa nıet bildirgen turǵyndar bar. Alǵashqy aptada 460 adam ekpe saldyrsa, 8 aqpanda atalǵan adamdardyń qataryn taǵy 60 adam tolyqtyrdy.
«Qazir álemdi dúrbeleńge salǵan qaterli indetti qalaı toqtatýǵa bolady? Bul oraıda vaktsınanyń orasan zor paıdasy bar ekenin bilemin. Men ekpe alýǵa sheshim qabyldap, dárigerler qadaǵalaýynan óttim. Jaýapty mamandar qan qysymymdy tekserdi. Qandaǵy ottegi quramyn baqylady. Eshqandaı qarsy kórsetkish baıqalǵan joq. Osydan keıin maǵan «Spýtnık V» vaktsınasy salyndy. Alǵashqy kúni keshke qaraı sál álsizdik baıqaldy. Kóp uzamaı ol baıqalmaı ketti. Ýaqyt óte kele barlyǵy óz qalpyna tústi. Qazirgi kóńil-kúıim erekshe. Sondyqtan barlyq qazaqstandyqtardy vaktsına alýǵa shaqyramyn», - dedi oblystyq perınataldy ortalyǵynyń bas dárigeri Oleg Kım.
Esterińizge sala ketelik, óńirge «Spýtnık V» reseılik vaktsınasynyń 1000 dozasy jetkizildi. Qalǵany kezeń-kezeńimen keletin bolady. Bul jumystarǵa qazir №1, №3 jáne №6 qalalyq emhanalarda 3 egý kabıneti daıyndalǵan. Ekpe jumystaryn júrgizýge oblys boıynsha barlyǵy 133 meıirbıke, 89 dýbler tartylǵan.
