Koronavırýs: Qytaı óz azamattaryn shetelden evakýatsııalaýda

BEIJІŃ. QazAqparat –Qytaıda koronavırýstan emdelip, aýrýhanadan shyǵarylǵan patsıentterdiń sany 50% asty. Bul týraly jeksenbi kúni QHR Densaýlyq saqtaý isteri jónindegi memlekettik komıtettiń resmı ókili Mı Fen brıfıng barysynda málim etti, dep habarlaıdy QazAqparat.

«Aýrýhanadan saýyǵyp shyqqandar úlesi 52,1% jetti. Bul, koronavırýstyń aldyn alý jáne indetpen kúres baǵytyndaǵy jalpy jaǵdaıdyń jaqsaryp kele jatqandyǵyn kórsetedi», - dep atap ótti Mı Fen.

Ótken jeksenbide Qytaıda Irannan oralǵan qytaılyq eki azamattan koronavırýs anyqtaldy. Eki naýqas Máskeý arqyly Qytaıǵa ushyp kelgen.

Qytaıǵa koronavırýsty «ákelýdiń» taǵy bir jaǵdaıy Shenchjende (Ońtústik Qytaı, Gýandýn provıntsııasy) tirkelgen. Naýqas – Londonnan Gonkong arqyly ushyp kelgen 25 jastaǵy er adam.

Ózge elderden koronavırýsty «ákelý» qaýpine baılanysty Qytaı endi shekaradaǵy baqylaýdy kúsheıtip, keletin jolaýshylarǵa qatysty shekteýler engizýde.

Qytaı óz azamattaryn shetelden evakýatsııalaıdy

«El Úkimeti óz azamattarynyń densaýlyǵyna qaýip tónip turǵan jaǵdaıda olardy shetelden evakýatsııalaýǵa kómek kórsetýge nıetti», - dep málimdedi QHR SІM konsýldyq qyzmet departamentiniń basshysy Tsýı Aımın.

Qytaılyq dıplomat 10 azamattyq reıs uıymdastyrylǵanyn jáne búginde 1,3 myńnan astam qytaılyq azamat QHR-ǵa jetkizilgenin atap ótti.

Sońǵy málimetter boıynsha, QHR-da koronavırýs juqtyrýdyń rastalǵan jaǵdaılarynyń jalpy sany – 80 026, 2912 adam kóz jumdy, 44 462 adam aýrýhanadan emdelip shyqty. Naýqastarmen baılanysta bolǵan 46 219 adam medıtsınalyq baqylaýda.