Koronavırýs: Qytaı dzıýdoshylary Parıjdegi Grand Slam týrnırine qatyspaıdy
NUR-SULTAN. QazAqparat – Qytaılyq dzıýdoshylar Parıjde 8-9 aqpanda ótetin Grand Slam týrnırine qatyspaıdy, dep habarlaıdy QazAqparat tilshisi.
Ulttyq olımpıada komıteti málim etkenindeı, koronavırýstyń órshýine baılanysty Qytaıdaǵy Frantsııa elshiligi jabylǵan.
Elshilik 10 aqpannan buryn ashylmaıdy, demek, qytaılyq delegatsııaǵa vıza alýǵa múmkindik joq. Osyǵan baılanysty Qytaı dzıýdo federatsııasy Parıjdegi Grand Slam týrnırine qatysýy tıis sportshylaryn shaqyrtyp aldy.
Halyqaralyq dzıýdo federatsııasy (IJF) eń aldymen sportshylardyń densaýlyǵy basty orynda turatyndyǵyn atap ótip, qytaılyq sportshylardyń alda bolatyn basqa álemdik jarystarǵa qatysýyna tilekshi ekendigin jetkizdi.
Eske sala keteıik, budan buryn Eldos Smetov bastaǵan 16 dzıýdoshynyń Parıjdegi Grand Slam týrnırinde baq synaıtynyn jazǵan bolatynbyz.
