Koronavırýs: Kýveıt barlyq kommertsııalyq áýe reısterin toqtatty
ELЬ-KÝVEIT. QazAqparat – Kýveıt álemde birinshi bolyp COVID-19 vırýsynyń taralýyna shekteý qoıý úshin barlyq kommertsııalyq áýe reısterin jaýyp tastady, dep habarlaıdy QazAqparat tilshisi.
Kýveıt Sıtı halyqaralyq áýejaıynyń jabylýyna baılanysty Parsy shyǵanaǵyndaǵy bul elge endi eshbir ushaq kelip qona almaıdy jáne ushyp shyǵa almaıdy. Áýe qaqpasy tek jolaýshylar ushaǵyna jáne óz eline qaıtyp kele jatqan Kýveıt azamattary mingen ushaqtarǵa ǵana ashyq.
Búgingi tańda Kýveıtte 100 adamnyń koronavırýs ınfektsııasyn juqtyrǵany anyqtaldy. Shyǵanaqtaǵy kórshi elderdegi jaǵdaı mynandaı: Saýd Arabııasynda COVID-19-ben aýyrýdyń 86 jaǵdaıy tirkelgen; BAÁ-de – 85; Irakta – 101, Bahreınde – 210; Katarda – 320. Taıaý Shyǵys óńiri boıynsha bul dert eń kóp taralǵan jáne álemde bul kórsetkish boıynsha úshinshi turǵan el – Iran. Onda 11364 adam bul vırýsty juqtyrǵan.
Buǵan deıin Kýveıt bıligi koronavırýsqa baılanysty birqatar elderge áýe reısin toqtatqan edi. Eldiń premer-mınıstri sheıh Sabah al-Haled al-Hamad as-Sabah pen Úkimet músheleri ótken aptada bolǵan shuǵyl keńes kezinde Bangladesh, Mysyr, Indııa, Lıvan, Sırııa, Fılıppın, Shrı-Lanka syndy elderge baratyn jáne keletin áýe reısterin toqtatqan edi.
Avtor: Ilıas Omarov
