Koronavırýs kúdigine ilikken 33 patsıent áli baqylaýda - Eljan Birtanov

NUR-SULTAN. QazAqparat - Koronavırýs kúdigine ilikken 33 patsıent áli de dárigerlerdiń baqylaýynda. Bul týraly búgin Úkimet otyrysynan keıin QR Densaýlyq saqtaý mınıstri Eljan Birtanov aıtty, dep habarlaıdy QazAqparat tilshisi.

«Koronavırýs kúdigimen arýhanaǵa jatqyzylǵan patsıentter em alyp jatyr. Olarǵa testileý júrgizildi, koronavırýs tabylǵan joq. Degenmen, olarda ótkir respıratorlyq ınfektsııa, tumaý bolǵandyqtan em alýyn jalǵastyryp jatyr, baqylaýymyzda», - dedi mınıstr

Eljan Birtanov búgin tańerteńgi málimetke sáıkes aýrýhanada 33 naýqas em alyp jatqanyn atap ótti. Sonymen qatar ol shetelden, tipti Qytaıdan kelgen adamdardyń barlyǵyn birdeı koronavırýsqa zerthanalyq testileýden ótkizýdiń esh qajettiligi joq ekenin basa aıtty.

«Atalǵan zertteý adamda aýrý belgisi bolsa ǵana júrgiziledi. Mundaı dene qyzýy, jótelý syndy belgilerdiń 99 paıyzynda ol kádimgi tumaý bolyp shyǵady. Qazir búkil 18 mln adamdy koronavırýsqa tekserip shyǵýdyń et qajettiligi bolmaı tur. Onyń máni de joq», - dedi ol.

Sonymen qatar mınıstr bul vırýs tóńireginde negizsiz dúrbeleń týdyrmaý qajettigin eskertti.

«Keıbir adamdar «men tekserilip, kóńilimdi tynyshtandyrǵym keledi» degen ustanymmen dúrbeleń jasaıdy. Árıne, tekserilýge bolady. Biraq, onyń esh máni joq. Bul úshin onyń alǵashqy belgileri bolýy tıis. Analız jasaý óte qymbat. Bul testini qazir ǵana ázirledik jáne oń nátıje kórsetip otyr. Biz ony kóbeıtemiz jáne bul koronavırýs kúdigine ilikken patsıentter jedel tekserýden ótedi degendi bildiredi»,- dedi Eljan Birtanov.