Koronavırýs: QR DSM elde qalyptasqan jaǵdaıǵa qatysty málimetterdi jarııalady

NUR-SULTAN. QazAqparat – Qytaı Halyq Respýblıkasymen shekaralas memleketterden kelgen azamattarǵa monıtorıng jalǵasýda, dep habarlady búgin QR Densaýlyq saqtaý mınıstrligi óziniń Facebook-paraqshasynda.

Ondaǵy málimetterge qaraǵanda, 2020 jyldyń 6 qańtarynan 1 aqpan aralyǵynda elimizge 27 myń 53 adam keldi.

Densaýlyq saqtaý mınıstrligi Taýarlar men qyzmetterdiń sapasy men qaýipsizdigin baqylaý komıtetiniń sanıtarlyq-karantındik pýnktteriniń mamandary Almaty qalasyndaǵy halyqaralyq áýejaıda - 20 myń 490 adamdy, temirjol vokzaldarynda – 399 jolaýshyny tekserdi.

JRVI belgilerimen 78 adam kópshilikten oqshaý aýrýhanaǵa jatqyzyldy, onyń 32-i jazylyp shyqty, qazir statsıonarlarda medıtsınalyq baqylaýda 46 adam qaldy.

Aýrýhanaǵa jatqyzylǵandardyń barlyǵynyń synamasyn qosymsha baqylaý úshin Almatydaǵy Aıqymbaev atyndaǵy asa qaýipti juqpaly aýrýlardyń ulttyq ǵylymı ortalyǵyna jiberildi. Bul ortalyq jańa koronavırýsty PTR-dıagnostıkalaý ádistemesi ıgergen.

Respýblıkada terapııa úshin qajetti dári-dármek pen medıtsınalyq buıymdar bar, juqpaly aýrýhanalardy oqshaýlaýǵa arnalǵan bokstar, arnaıy dárigerlik jáne orta medıtsınalyq personal daıyndalǵan.

Aıta ketý kerek, bul jaǵdaı QR Densaýlyq saqtaý mınıstrliginiń turaqty baqylaýynda.

«Resmı aqparatty Densaýlyq saqtaý mınıstrliginiń Feısbýktegi paraqshasynan oqı alasyz jáne kez kelgen suraq boıynsha táýlik boıy jumys isteıtin 1406 baılanys-ortalyǵyna qońyraý shalýǵa bolady»,-delingen habarlamada.