Koronavırýs: Kókshetaý avtobýs parki kólikteriniń qozǵalysy shekteldi
KÓKShETAÝ. QazAqparat – Kókshetaýda koronavırýs juqtyrǵan adammen jaqyn baılanysta bolǵandar «Kókshetaý avtobýs parki» JShS-nen tabyldy. Sol sebepti atalmysh kásiporynnyń qalaishilik baǵyttaǵy avtobýstarynyń qozǵalysyna shekteý qoıyldy, dep habarlaıdy QazAqparat tilshisi qala ákimdiginiń baspasóz qyzmetine silteme jasap.
«Oblys ortalyǵyndaǵy epıdemıologııalyq jaǵdaıdyń órshýi jáne koronavırýs juqtyrǵan tulǵanyń anyqtalýy, sondaı-aq, jaqyn baılanysta bolǵan adamdardyń «Kókshetaý avtobýs parki» JShS-nen tabylýyna baılanysty atalmysh kásiporynnyń qalaishilik baǵyttaǵy avtobýstarynyń qozǵalysyna shekteý qoıyldy.
Bular qalaishilik №1,5,9,10,11,12,13,15,15A,16,18,25 baǵyttaǵy, saıajaıǵa qatynaıtyn №36 baǵyttaǵy avtobýstar. Endi bul negizgi baǵyttardy «SeıNur fırmasy» JShS-niń №9 (2 ret shyǵady), №12 (4 ret shyǵady), №13 (1 ret shyǵady), «Qalyshev JK» kásipornynyń №18 (1 ret shyǵady), «ATP-Tulpar» kásiporynyń №36 (1 ret shyǵady) avtobýstary qamtamasyz etedi.
Qalǵan 8 baǵyt boıynsha aldaǵy ýaqytta qosymsha shara qoldanylady jáne ol týraly eskertiletin bolady»,- deıdi vedomstvodan.
