Koronavırýs kezinde ókpe qalaı zaqymdanady – dáriger túsindirdi

NUR-SULTAN. QazAqparat - Koronavırýs kezinde ókpe qalaı zaqymdanady? Bul saýalǵa Astana medıtsına ýnıversıtetiniń kafedra meńgerýshisi, medıtsına ǵylymdarynyń kandıdaty Nurıla Maltabarova jaýap berdi, dep habarlaıdy QazAqparat tilshisi.

«Búginde áleýmettik jelide klınıkalyq hattamaǵa, koronavırýstan ólim-jitimge qatysty aqparat óte kóp. Sondyqtan koronavırýs ınfektsııasynyń aǵymynyń erekshelikteri jáne nelikten ólim-jitim oryn alatyndyǵyn túsindirgim keledi. Qazirgi ýaqytta ókpeniń isinýi – bul tek koronavırýs ınfektsııasy kezinde ǵana emes, sonymen birge aýyr qaterli jaǵdaıda da qaýipti asqyný. Ókpe tini isinip, vırýs aralyq keńistikti zaqymdaı bastaıdy. Ol jerde suıyqtyq jınalady. Ókinishke oraı aýrýdyń aýyr satysynda ókpe men tamyrlar arasyndaǵy osynaý keńistikke óte kóp sý jınalyp, ókpe isinedi. Dál osy jaıt ólim-jitimge alyp kelýi múmkin. Damý joldary óte kóp. Biraq, eń bastysy, vırýs ókpe tinin jyldam zaqymdaıtyndyǵyn aıtýymyz kerek», - dedi ol Ortalyq kommýnıkatsııalar qyzmetindegi brıfıng barysynda.

Onyń atap ótýinshe, arterıaldy gıpertenzııa, júrek-qan tamyr júıesi aýrýlary, qant dıabeti, semizdik syndy syrqattar kezinde de ókpe qabynýy múmkin.

«Júrek-qan tamyrlary jumysynyń jetkiliksizdigi saldarynan aǵzada suıyqtyq kóbeıip, ókpedegi isik ulǵaıady. Biz ólim-jitim sebebiniń biri ókpe qabynýy bolýy múmkin degenimizde, bul ınfýzııalyq preparattardan emes, júrek-qan tamyry júıesi jumysynyń jetkiliksizdiginen aǵzada suıyqtyqtyń artqandyǵynan degendi bildiredi. Mundaı jaıt sozylmaly aýrýlar túrindegi joǵaryda atalǵan táýekel faktorlary bar patsıentterdiń basym bóliginde oryn alady», - dedi Nurıla Maltabarova.