Koronavırýs: Qazaqstandyq vaktsınanyń klınıkalyq synaǵy jiti baqylaýda – Dáýren Abaev
«Taıaýda ǵana elimizde koronavırýsqa qarsy vaktsınatsııa bastaldy. Bul protsess halyqty ımmýndaýdy jaqtaýshylar men oǵan qarsylyq tanytýshylardyń arasyndaǵy talas-tartyspen ótip jatyr. Ókinishke oraı, utymdy dáleldermen qatar daýlasýshylar jıi kemsitýshilikke jol berip jatady. Men vaktsınatsııany jaqtaımyn. Ekpe jasatamyn ba? Iá, sózsiz. Kezegim kelgen sátte-aq muny jarııa túrde jasaýǵa daıynmyn», - dedi ol.
Dáýren Abaevtyń qazaqstandyq vaktsınanyń klınıkalyq synaq nátıjeleri jiti baqylaýda turǵandyǵyn atap ótti.
«Qazir úshinshi kezeńi ótip jatyr. Tıimdiligi joǵary. Kúrdeli janama áserleri tirkelgen joq. Bizdiń vaktsınaǵa ınaktıvtelgen, ıaǵnı ólgen vırýs negiz bolǵan. Ol aǵzamyzdy qorǵaıtyn antıdenelerdiń túzilýine septigin tıgizedi. Ázirleýshi – Bıologııalyq qaýpsizdik problemalarynyń ǵylymı-zertteý ınstıtýty barlyq qujatty Dúnıejúzilik densaýlyq saqtaý uıymyna beredi. Buǵan qosa, biz eshqaıda da asyǵyp otyrǵanymyz joq. Barlyǵy tyńǵylyqty tekseriledi. Bul iste asyǵystyqqa jol berýge bolmaıdy», - dedi Prezıdent Ákimshiligi basshysynyń birinshi orynbasary.
Sonymen qatar ol álemdegi oqıǵalar otandyq vaktsınaǵa basymdyq berý strategııalyq durys sheshim bolǵandyǵyn kórsetkenin atap ótti.
«Sebebi qarapaıym – bul vaktsınanyń jetispeýshiligi. Búginde batys elderi olardyń eksportyna shekteý engizip jatyr. Álem ózgerýde. Árkim ózi úshin. Ondaǵan el jahandyq ımmýndaýdan tysqary qalý qaýpinde tur. Bul neni bildiredi? Eń aldymen, olarǵa koronadaǵdarysty eńserý úshin ýaqyt birshama uzaǵyraq qajet bolady. Al olardyń azamattary jer sharynyń kóptegen buryshynda unamsyz qonaqqa aınalady. Prezıdent aıtqandaı, Qazaqstanda vaktsınatsııa múldem tegin. Árıne, birinshi kezekte dárigerler, ınfektsııalyq aýrýhanalardyń qyzmetkerleri, koronavırýspen kúrestiń alǵy shebinde júrgender ekpe alady», - dedi Dáýren Abaev.
QR Prezıdenti Ákimshiligi basshysynyń birinshi orynbasary vaktsınatsııa tóńiregindegi daý-damaıǵa qatysty da pikirin bildirip ótti.
«Myna bir mańyzdy tusyn atap ótkim keledi: Memleket vaktsınatsııalaýǵa eshkimdi májbúrlemeıdi. Tek erikti túrde ekpe jasalady. Elimizde shúbámen qaraýshylardyń da bar ekendigin bilemiz. Biraq, mundaı shúbálanýshylardyń arasynda tanymal pikirlerdiń bolǵanyna qaramastan margınaldy teorııany ustanýshylar tym az. Áleýmettik ólshem jekelegen azamattardyń vaktsınanyń jedel aradaǵy óndirisine baılanysty onyń janama áserlerinen qorqatyndyǵyn kórsetip otyr. Túptep kelgende bul adamdar vaktsınatsııaǵa qarsy emes, olarǵa tek qosymsha kepil ǵana qajet. Sondyqtan da qazirgi ýaqytta barlyq óńirde jaýapty memlekettik qyzmetshiler ekpe alyp jatyr. Jáne de muny jarııa túrde jasaýda. Bul «haıp» qýý, upaı jınaý, atyn shyǵarýǵa degen umtylys emes. Bul tolyqtaı senim ahýalyn qalyptastyrýǵa qaraı jasalǵan qadam», - dedi ol.
