Koronavırýs: Qazaqstanda volonterler tegin psıhologııalyq kómek kórsetip jatyr
Volonterler odaǵy ókilderiniń aıtýynsha, turǵyndarǵa qyzmetti psıhologııa salasy boıynsha biliktiligi joǵary mamandar eki tilde kórsetedi. Bul rette olar azamattardyń genderlik quramyn da nazarǵa alǵan. Mysaly er adamǵa qyzmetti er adam kórsetedi. Qyzmet kórsetý barysynda aýrý juqtyryp alý qorqynyshynan, karantındik shekteýler jaǵdaıyndaǵy kúızelisten arylý, iskerlik belsendiliktiń tómendeýi sııaqty ózge de birqatar máseleler qamtylady.
Maman kómegine júginý úshin sall ortalyǵyna +77172272090, +77172703100 nómirlerine habarlasý kerek. Saǵat 9:00-den 16:00-ge deıin habarlasýǵa bolady.
«Bul qyzmet túri 8 sáýirden bastap iske qosyldy. Búginge deıin 10 adam habarlasyp, psıholog keńesin aldy. Keıbirin koronavırýsqa qatysty suraqtar mazalasa, keıbiri osy máseleni oılap uıqysy qashqanyn, boıyn úreı bıleıtinin aıtady. Biz suraqty qabyldap alǵannan keıin ol adam týraly málimetterdi psıhologqa beremiz. Psıholog olarǵa telefon, uıaly telefon, vıdeoqońyraý arqyly habarlasyp, psıhologııalyq kómek kórsetedi», - deıdi baılanys ortalyǵynyń menedjeri Aınur Baıǵojına.
Mamandarǵa habarlasqan soń ózińizdi qandaı másele mazalaıtynyn aıtyp, telefon nómirińizdi qaldyrasyz jáne sizge qaı ýaqytta, qaı tilde habarlasý kerek ekenin aıtasyz. Mamandar sizge ózińiz qalaǵan tilde habarlasyp, máseleni sheshýge qatysty kómekterin kórsetedi.