Koronavırýs: Qazaqstanda statsıonarlyq karantınde jatqandardyń sany 1400-den asty

NUR-SULTAN. QazAqparat – Densaýlyq saqtaý mınıstri Eljan Birtanov qazirgi ýaqytta el aýmaǵynda 1400-den astam azamat statsıonarlyq karantınde, al 545 azamat úı karantıninde jatqanyn málim etti, dep habarlaıdy QazAqparat tilshisi.

«Jalpy el boıynsha qazirgi tańda 1400-den astam azamat statsıonarlyq karantınde, al 545 azamat úı karantıninde jatyr. Taǵy basqa memleketten kelip jatqan azamattar úsh sanat boıynsha baqylaýda nemese jalpy esepte turady. Osy jaǵdaıǵa baılanysty qajetti is-sharalar memlekettik deńgeıde vedomstvoaralyq komıssııanyń sheshimimen qabyldanýda. Ózderińizge málim, jalpy úlken sharalarǵa tyıym salynyp, olar toqtatyldy. Qazir qajetti sanıtarlyq-epıdemıologııalyq sharalar engizilýde. Árıne, bizdiń negizgi maqsatymyz – osy koronavırýs ınfektsııasynyń taratylýyn toqtatý. Bul baǵytta sanıtarlyq-epıdemıologııalyq qyzmet qajetti barlyq sharany qabyldaýda», - dedi Eljan Birtanov «Habar 24» arnasynan tikeleı efırde.

Onyń aıtýynsha halyq kóp jınalatyn oryndarda arnaıy sharalar kúsheıtilgen. Almaty jáne Nur-Sultan qalalarynda tirkelgen azamattarǵa baılanysty barlyq baqylaý sharasy engizildi.

Aıta ketsek birer mınýt buryn ǵana Eljan Birtanov Qazaqstanda koronavırýs juqtyrǵandardyń sany 8-ge jetkenin, jańadan juqtyrǵandardyń biri Seýlden ushyp kelgenin habarlaǵan edi.