Koronavırýs: Qazaqstanda sımptomdy jáne sımptomsyz naýqastar sany 27 myńnan asty
NUR-SULTAN. QazAqparat – QR DSM Qoǵamdyq densaýlyq saqtaý ulttyq ortalyǵy Juqpaly aýrýlardyń aldyn alý departamentiniń dırektory Jumabek Bekenov eldegi epıdemıologııalyq ahýaldy baıandady, dep habarlaıdy QazAqparat tilshisi.
«Qazirgi tańda Qazaqstan Respýblıkasynda 27 541 COVID-19 jaǵdaıy tirkelip otyr. Onyń sımptomsyz túri – 9 809 adamda, sımptomdy túri – 17 732 adamda. Sońǵy táýlikte 1 471 aýrý tirkeldi, onyń 507 – sımptommen, 964-i – sımptomsyz», - dedi spıker Ortalyq kommýnıkatsııalar qyzmetinde ótken onlaın brıfıngte.
Onyń aıtýynsha, 10 962 adam nemese aýyrǵandardyń 62 paıyzy syrqattan jazylyp shyqty.
«Elimizdiń barlyq statsıonarlyq karantıninde 1 868 adam, úı karantıninde – 11 563 adam jatyr. COVID-19 aýyryp, aýrýhanada jatqan naýqastar sany – 8 052, KVI juqtyryp, ambýlatorııalyq baqylaýda 8 472 adam tur», - dedi Jumabek Bekenov.
