Koronavırýs: Qazaqstanda 556 adam janama nemese ilespe aýrýlardan qaıtys bolǵan

NUR-SULTAN. QazAqparat – Qazaqstanda koronavırýsqa qatysty epıdemıologııalyq ahýal turaqty dep baǵalanyp otyr. Bul týraly QR Densaýlyq saqtaý mınıstrliginiń resmı ókili Baǵdat Qojahmetov aıtty, dep habarlaıdy QazAqparat tilshisi.

«Qazaqstanda epıdemıologııalyq ahýal turaqty dep baǵalanyp otyr. Koronavırýs ınfektsııasyn juqtyrý deńgeıi tómendep keledi. 4 qyrkúıektegi málimet boıynsha, 106 121 naýqas koronavırýs ınfektsııasyn juqtyrǵan. Sońǵy táýlikte 89 jaǵdaı tirkeldi. Qazir 6 myńǵa jýyq patsıent em qabyldaýda, 98 585 naýqas jazylyp shyqty. Ókinishke qaraı, 1 612 adam qaıtys boldy», - dedi ol Ortalyq kommýnıkatsııalar qyzmetindegi baspasóz máslıhatynda.

Sondaı-aq resmı ókildiń dereginshe, koronavırýsqa uqsas belgileri bar, biraq PTR-testi teris shyqqan 26 803 adam tirkelgen. Olardyń arasynda 305 patsıent qaıtys boldy. 20 972 naýqas em qabyldap jatyr.

Ólim-jitim jaǵdaıyna saraptama jasaıtyn arnaýly komıssııanyń qorytyndysyna sáıkes, 556 adam janama nemese ilespe aýrýlardyń áserinen qaıtys boldy.

«Búgin Densaýlyq saqtaý mınıstri Túrkistan oblysynda jumys saparmen júr. Saparynyń maqsaty - óńirlerdegi medıtsına mekemeleriniń daıyndyǵyn tekserý. «Kúzde koronavırýstyń ekinshi tolqyny bolýy múmkin» degen boljam bar. Sondyqtan qaýip-qaterge daıyn bolý úshin mınıstr ózi aımaqtardy aralaýda», - dedi ol.