Koronavırýs: Qazaqstanda 11 naýqastyń jaǵdaıy aýyr
Bul týraly QR Densaýlyq saqtaý mınıstri Eljan Birtanov Ortalyq kommýnıkatsııalar qyzmetindegi brıfıngte aıtyp berdi.
Mınıstrdiń aıtýynsha, dúnıe júzinde koronavırýs jaǵdaıy nasharlap kele jatyr. Naýqastar sany 8,4 paıyzǵa ósti, álem boıynsha bul indetten 53 myń adam kóz jumǵan.
«Elimizde koronavırýs juqtyrý boıynsha barlyǵy 453 jaǵdaı tirkelgen. Onyń eń kóbi Nur Sultan (199) jáne Almaty (93) qalalarynda. 29 adam emdelip, aýrýhanadan shyǵaryldy. Qazir 11 naýqastyń jaǵdaıy qıyn. Olar ıntensıvti reanımatsııa bólimderinde em qabyldap jatyr. 68 patsıent - ortasha deńgeıde, 341 patsıenttiń jaǵdaıy jeńil nemese sımptomsyz naýqastar», - dedi E. Birtanov.
Osy naýqastarmen baılanysta bolǵan 13 467 adam anyqtalǵan. Olardyń arasynda 442 azamat shetelge shyǵyp ketken.
«Qalǵan 13025 azamattyń 96,7 paıyzy tabylyp, statsıonarǵa jáne úıge oqshaýlandy. Bul jumystar jalǵasyp jatyr», - dedi mınıstr.