Koronavırýs: Qazaqstan vaktsınaǵa qol jetkizýge kómektesetin APVAX mehanızmin qarastyrýda

NUR-SULTAN. QazAqparat – QR Densaýlyq saqtaý mınıstriniń birinshi orynbasary Marat Shoranov Azııa damý bankiniń basshylyǵymen vaktsınoprofılaktıka boıynsha seriktestik ornatý máselesin talqylady, dep habarlaıdy QazAqparat.

Mınıstrlikten málim etkendeı, M.Shoranov Qazaqstandaǵy Azııa damý bankiniń turaqty ókildiginiń dırektory Narıman Mannapbekovpen jáne Ortalyq jáne Batys Azııa elderi boıynsha Azııa damý bankiniń ókilderimen kezdesti.

M.Shoranov Qazaqstanda COVID-19 taralýynyń aldyn alý boıynsha júrgizilip jatqan jumystar, sonyń ishinde vaktsınoprofılaktıka máseleleri týraly habardar etti. Sondaı-aq ol ADB-ǵa densaýlyq saqtaý jobalary boıynsha tıimdi uzaq merzimdi yntymaqtastyq úshin alǵys bildirdi. ADB osy yntymaqtastyq aıasynda jáne koronavırýspen kúres maqsatynda az qamtylǵan otbasylardy quramynda dári-dármek pen qorǵaýdyń bastapqy medıtsınalyq quraldary bar qobdıshalarmen qamtamasyz etýge granttyq kómek kórsetken.

«1 aqpannan Qazaqstan Respýblıkasynda halyqty jappaı koronavırýs ınfektsııasyna qarsy vaktsınatsııa bastaldy. Birinshi kezekte ol ınfektsııalyq statsıonarlardyń, jedel medıtsınalyq járdemniń, sondaı-aq basqa da medıtsına qyzmetkerlerin qamtıdy. Keıin vaktsına kóleminiń jetkiliktiligine qaraı vaktsınalanatyn kontıngentti odan ári keńeıte otyryp, qatarǵa pedagog, kúsh qurylymdarynyń qyzmetkerleri qosylatyn bolady. Búginde halyqty koronavırýstan qorǵaý, ıaǵnı KVI boıynsha qalyptasqan jaǵdaıdy jeńýge jáne karantınsiz ádettegi ómirge oralý úshin vaktsınatsııamen qamtý óte mańyzdy», - dedi M.Shoranov.

Óz kezeginde N.Mannapbekov ADB-nyń Qazaqstandaǵy ókildiginiń qazirgi qyzmeti týraly bólisti. Kezdesý barysynda ADB qyzmetkerleri vaktsınaǵa qol jetkizýge járdemdesýdiń Azııa-Tynyq muhıty tetigin (Asia Pacific Vaccine access Facility, APVAX) tanystyrdy.

APVAX damýshy múshe elderge COVID-19 vaktsınalaryn satyp alýǵa jáne jetkizýge qoldaý kórsetetin resýrstar paketi men mehanızmdi usynady jáne 2 komponentten turady: jedel áreket etý komponenti jáne ınvestıtsııalyq komponent.

Vaktsınamen aldyn alý máseleleri boıynsha sheteldik seriktesterdi yntymaqtastyqqa tartý boıynsha júrgizilip jatqan jumystyń mańyzdylyǵyn eskere otyryp taraptar Qazaqstan Respýblıkasynyń atalǵan APVAX tetigine qatysý múmkindigin qarastyrýǵa kelisti.