Koronavırýs: Qazaqstan shekara beketteri men áýejaılarda baqylaýdy kúsheıtpek

NUR-SULTAN. QazAqparat - Densaýlyq saqtaý mınıstrligi Qytaımen birge basqa eldermen memlekettik shekaradaǵy beketterde de sanıtarlyq baqylaýdy kúsheıtpek. Bul týraly OKQ-da ótken baspasóz máslıhatynda Densaýlyq saqtaý mınıstri Eljan Birtanov málim etti, dep habarlaıdy Qazaqparat tilshisi.

«Dúnıejúzilik densaýlyq saqtaý uıymynyń tótenshe jaǵdaıdyń jańa deńgeıin jarııalaýyna baılanysty qoǵamdyq densaýlyq saqtaý salasynda qosymsha sharalar qabyldandy. Eń birinshi kezekte búginnen bastap Densaýlyq saqtaý mınıstrligi Qytaı ǵana emes, basqa eldermen de memlekettik shekarada ornalasqan beketterde sanıtarlyq baqylaýdy kúsheıtedi. Bul rette eń aldymen halyqaralyq reıster oryndalatyn áýejaılar, sonymen birge bizdiń eldiń halyqaralyq teńiz jáne avtokólik joldarymen shektesetin shekaralary týraly aıtylyp otyr», - dedi Eljan Birtanov.