Koronavırýs: Qazaqstan ǵalymdary PTR-testti nebári 6 kúnde daıyndaǵan
NUR-SULTAN. QazAqparat - Qazaqstan ǵalymdary nebári 6 kúnde koronavırýstyń bar-joǵyn anyqtaıtyn senimdi PTR-test júıesin ázirledi. Bul týraly búgin Úkimet otyrysynda QR Bilim jáne ǵylym mınıstri Ashat Aımaǵambetov aıtty, dep habarlaıdy QazAqparat tilshisi.
«Qazaqstanda bıologııalyq qaýipsizdik jáne bıotehnologııalar salasy boıynsha ǵylymı-zertteýler júıeli túrde júrgizilip jatyr. Osy máselemen jalpy 12 ǵylymı uıym aınalysady. Onda 4,5 myńǵa jýyq qyzmetker jumys isteıdi, onyń 1 300-i ǵylymı ataǵy bar qyzmetkerler. «Bolashaq» baǵdarlamasynyń 157 stıpendıaty bıotehnologııa, genetıka jáne vırýsologııa baǵyttary boıynsha álemniń úzdik ýnıversıtetterinde bilim aldy. Sonymen qatar qazirgi ýaqytta 4,5 myńǵa jýyq bakalavr, 300-ge jýyq magıstrant, 59 doktorant elimizdiń 19 joǵary oqý ornynda bilim alýda», - dedi ol.
Osy rette mınıstr elimizdiń 2 ǵylymı mekemesine qysqasha toqtalyp ótti. Onyń biri - Ulttyq bıotehnologııa ortalyǵy. Sertıfıkattalǵan 25 ǵylymı zerthanasy bar ortalyqta bilikti qyzmetkerler jumys jasaıdy.
«Pandemııanyń basynda test júıeleri elimizge jetkizilmeı turǵanda osy uıymnyń ǵalymdary nebári 6 kúnniń ishinde SARS-CoV-2 koronavırýstyń tiri shtamynsyz jasandy sıntez arqyly jańa koronavırýstyń bar-joǵyn anyqtaıtyn senimdi PTR-test júıesin ázirledi. Sonyń arqasynda indettiń birinshi kúnderi osy testileý júıesimen jalpy dıagnostıka iske asyryldy. Densaýlyq saqtaý mıınıstrliginiń tapsyrmasymen ortalyq qazirgi ýaqytta 11 PTR-test júıesin ázirlep berdi», - dedi Ashat Aımaǵambetov.
Mınıstr toqtalǵan ekinshi mekeme Bıotehnologııalyq qaýipsizdik máseleleri ǵylymı-zertteý ınstıtýty boldy.
«Bul ınstıtýt 1958 jyldan beri jumys istep keledi. 13 bıologııalyq qaýipsizdik zerthanasynda qaýipti ınfektsııalarmen jumys isteıtin elimizdegi jetekshi ǵalymdar toptastyrylǵan. Jalpy qaýipti jáne asa qaýipti jumystardyń barlyq túri qaýipsizdiktiń úshinshi deńgeıimen qamtylǵan. Instıtýt asa qaýipti ınfektsııalarǵa qarsy vaktsınalardy ázirleý boıynsha Dúnıejúzilik densaýlyq saqtaý uıymymen kelisimshart jasasqan jáne jumys atqarady. Instıtýt zertteýleri negizinen medıtsına men aýyl sharýashylyǵyna arnalǵan vaktsınalardyń jańa túrlerin ázirleýge, ımmýno-bıologııalyq preparattardy óndirýge, qaýipti jáne asa qaýipti aýrýlardy dıagnostıkalaý boıynsha test júıelerin ázirleýge baǵyttalǵan», - dedi ol.
