Koronavırýs: Qaı elderde tótenshe jaǵdaı engizildi
NUR-SULTAN. QazAqparat – Koronavırýstyń jańa túri COVID-19 jappaı taralýyna baılanysty kóptegen memleketter Tótenshe jaǵdaı rejımin engizdi. Qazaqstanmen birge, TJ rejımi Italııa, AQSh, Ispanııa, Chehııa, Estonııa, Rýmynııa, Bolgarııa Slovakııa jáne Majarstanda jarııalandy, dep habarlaıdy QazAqparat.
«Qazaqstan tótenshe jaǵdaıdy engizgen jalǵyz memleket emes. Tótenshe jaǵdaı tártibi AQSh, Italııa, Bolgarııa, Serbııa, Estonııa, Rýmynııa, Chehııa jáne basqa da elderde engizilgen. Birqatar memleketter vırýstyń taralýy keń etek jaıyp jáne jaǵdaı baqylaýdan shyǵa bastaǵan kezde ǵana tótenshe jaǵdaıdy engizýge májbúr boldy. Qazaqstandyq bılik tótenshe jaǵdaıdy aldyn alý sharasy retinde engizýde», - dep jazdy QR Prezıdentiniń keńesshisi Erlan Karın Facebook paraqshasynda.
11 naýryzda Dúnıejúzilik densaýlyq saqtaý uıymy (DDU) jańa koronavırýstyń órshýin pandemııa dep baǵalady. «COVID-19 álemniń 158 eline taraldy jáne 169 myńnan astam adamǵa juqty. Sońǵy derekter boıynsha, QHR-da 80 884 juqtyrý oqıǵasy anyqtaldy, onyń 3 199-y ólimge ákep soqty. Koronavırýstyq indettiń oshaǵy qazir – Qytaı emes, Eýropa», dep jazdy DDU.
Qytaıdan keıingi jappaı ınfektsııa tirkelgen Italııada 31 qańtarda tótenshe jaǵdaı engizildi. Italııa alǵashqylardyń biri bolyp mundaı rejımdi engizdi. Qazirgi ýaqytta bul elde 24 myńnan astam adam koronavırýspen aýyryp, 1809 adam qaıtys boldy. Memleket basshysynyń sheshimimen rejım 6 aı boıy óz kúshinde bolady.
11 naýryz kúni Majarstan Úkimeti koronavırýske baılanysty Tótenshe jaǵdaı jarııalaýdy uıǵardy. Eldegi barlyq buqaralyq jáne saltanatty sharalar toqtatyldy. Bul elde 32 adam koronavırýstyń jańa túrin juqtyrdy.
Amerıka Qurama Shtattarynda 14 naýryzdan bastap, koronavırýs ınfektsııasynyń taralýyna baılanysty tótenshe jaǵdaı jarııalandy. Ol ýaqytta AQSh-ta COVID-19-ǵa shaldyǵýdyń 1700 jaǵdaıy tirkelip, 40-tan astam adam kóz jumǵan edi.
«Tótenshe jaǵdaı Trampqa ulttyq apattarǵa qarsy qordan koronavırýspen kúreske 50 mlrd dollarǵa deıin bólýge, sondaı-aq federaldy bılikke shtattarmen jáne jergilikti organdarmen is-qımyldardy anaǵurlym tıimdi úılestirýge múmkindik ashady», - dep jazady VVS.
Sondaı-aq AQSh prezıdenti koronavırýsty anyqtaıtyn dıagnostıkalyq testilerdiń qosymsha jarty mıllıon jıyntyǵy aldaǵy aptanyń basynda jáne bir aı ishinde taǵy 5 mıllıony dárigerlerge jetkiziletinin málim etti. Bul rette onyń pikirinshe, olardy qoldanýdyń qajeti bolmaıdy.
AQSh Prezıdenti málim etkendeı, onyń bul jarlyǵy densaýlyq saqtaý mınıstriniń quzyretin keńeıtedi. Budan bylaı onyń qabyldaıtyn sharalary qoldanystaǵy keıbir zańdarmen jáne erejelermen shektelmeıtin bolady. Bul, densaýlyq saqtaý organdaryna anaǵurlym jedel ári ıkemdi áreket etýge múmkindik beredi.
Sonymen birge, qazirgi ýaqytta Estonııada Tótenshe jaǵdaı rejımi qosyldy. El aýmaǵyna shetel azamattarynyń kelýine, barlyq qoǵamdyq sharalarǵa tyıym salynady, mektepter, ýnıversıtetter, kınoteatrlar, mýzeıler, teatrlar men sport zaldarynyń qyzmeti toqtatylady. Saýda ortalyqtarynyń jumysy shekteldi.
Dál osyndaı jaǵdaı Chehııa, Bolgarııa, Slovakııa, Serbııada da oryn aldy. Bul memleketter sheteldik azamattardyń kelýine tyıym saldy. Máselen, Chehııa astanasynda tipti qoǵamdyq tamaqtaný oryndary jabyldy. Olardyń kópshiligi taǵam jetkizý qyzmetterimen birlesip jumys isteıdi.
15 naýryzda taǵy bir el – Ispanııa Tótenshe jaǵdaı engizetinin jarııalady. Tótenshe jaǵdaı 15 kúnge sozylady. Bılik koronavırýstyq ınfektsııanyń jappaı taralý qaýpi bolǵandyqtan, el ishindegi qozǵalysty shekteýdi uıǵardy. Tótenshe jaǵdaıdy Ispanııa premer-mınıstri Pedro Sanches mınıstrler kabınetindegi jeti saǵattyq kelissózderden keıin jarııalady. Munda turǵyndarǵa qajet kezde ǵana úıden shyǵýǵa ruqsat etiledi.
15 naýryzda Serbııa Prezıdenti Aleksandr Výchıch turǵyndar aldynda sóılegen sózinde el aýmaǵyna Tótenshe jaǵdaı engiziletinin málimdedi. Sonymen birge, Prezıdent, sharalardyń eń aldymen ınfektsııa juqtyrý qaýpi bar qarttardy qorǵaýǵa baǵyttalǵanyn atap ótti. Serbııadaǵy balabaqshalar, mektepter, ýnıversıtetter jabyq. Memleket sheteldik azamattarǵa, atap aıtqanda, Italııa, Iran, Qytaı, Ońtústik Koreıa, Shveıtsarııadan kelgenderge tyıym saldy.
Búginnen bastap Slovakııada Tótenshe jaǵdaı engizildi. Azyq-túlik dúkenderi men dárihanalardy qospaǵanda, barlyq saýda oryndarynyń jumysy toqtatylyp, bankter men poshta bólimsheleri jumys isteýge ruqsat etildi.
Koronavırýstyń beti qaıta bastaǵanymen Beıjińde joǵary deńgeıdegi tótenshe jaǵdaı toqtatylmady. QHR-dyń 24 ákimshilik-aýmaqtyq bóliginde halyqtyń densaýlyǵyna baılanysty tótenshe jaǵdaılarǵa den qoıý deńgeıi tómendetilse de, Beıjiń, Shanhaı, Tıantszın sııaqty megapolısterinde eń joǵary deńgeıde qala beredi.
Azamattardyń ómiri men densaýlyǵyn qorǵaý maqsatynda QR Prezıdentiniń Jarlyǵymen Qazaqstan Respýblıkasynyń barlyq aýmaǵynda 2020 jylǵy 16 naýryzdan 2020 jylǵy 15 sáýirge deıin tótenshe jaǵdaı engizildi.
Sondaı-aq, Qazaqstan azamattaryna 15 sáýirge deıin el aýmaǵynan shyǵýǵa tyıym salyndy.
QR Prezıdenti Qasym-Jomart Toqaev el halqyna úndeý joldady.
