Koronavırýs qaýpin jaqyndarymyzdan aırylǵanda ǵana túsine bastadyq - Nadejda Petýhova
«Elimizde koronavırýs indetine baılanysty óte kúrdeli ahýal qalyptasyp otyr. Іndet bastalǵan kezde aýrýǵa shaldyqqandardyń kóp bolmaýy halyq arasynda osynaý jymysqy derttiń aýyrlyǵy men tosynnan keletindigine qatysty túsiniktiń qalyptaspaýyna sebep boldy. Biz tótenshe jaǵdaı rejımi aıaqtala salysymen epıdemııaǵa qarsy sharalardy saqtaýdy qoıdyq. Bul dál qazirgi ýaqyttaǵy aýrýǵa shaldyǵýlar men ólim-jitimniń ósimine alyp keldi. Dárigerler óte aýyr jaǵdaıda jumys isteýde. Shamadan tys júkteme men psıhologııalyq stress saldarynan ózderi de naýqastanyp jatyr», - dep jazdy ol Facebook-paraqshasynda.
Osy rette qaýymdastyq tóraıymy Memlekettik komıssııa eldegi indetpen aýyrǵandar sanyn tómendetý maqsatynda, epıdemıologııalyq jaǵdaıdy turaqtandyrý úshin sheshim qabyldaǵanyn atap ótedi.
«Biz kórermen kóp jınalatyn oıyn-saýyq sharalaryna, otbasylyq toı-tomalaqtarǵa, salondar men shashtarazdarǵa, fıtnes-klýbtarǵa, dinı nysandarǵa barý ınfektsııanyń jyldam taralýyna, eń qorqynyshtysy ólim-jitim artýyna alyp keletindigin aıqyn túsinýimiz kerek. Ózimizdi jáne jaqyndarymyzdy qorǵaıyq. Eń qundymyz – bul ómir men densaýlyq. Osynaý shyndyqty biz jaqyndarymyzdan aıyrylǵanda ǵana túsine bastaımyz. Karantın sharalaryn saqtaý, tazalyq sharalaryn tyńǵylyqty oryndaý jáne bolashaqqa senimmen qaraý barlyǵymyzǵa osynaý kúrdeli kezeńdi eńserýge múmkindik beredi», - dedi Nadejda Petýhova.
