Koronavırýs qaýpi: Sottalǵandar týystarymen qashan kezdese alady
NUR-SULTAN. QazAqparat - QR Іshki ister mınıstri Erlan Turǵymbaev halyqqa onlaın-esep berý barysynda sottalǵandarǵa týystarymen júzdesýge qashan múmkindik beriletinin aıtty, dep habarlaıdy QazAqparat tilshisi.
«Shynymen de, karantın talaptaryna baılanysty barlyq kezdesýlerge tyıym salyndy. Degenmen, biz telefonmen sóılesýler sanyn arttyrdyq. Zattar, sonymen qatar azyq-túlik berýlerine shekteý qoımadyq. Biraq, karantın sharalary aıaqtalǵannan keıin barlyq týǵan-týystaryn sottalǵandarmen júzdesýge ruqsat beremiz», - dedi mınıstr Ortalyq kommýnıkatsııalar qyzmetinde ótken kezdesý barysynda turǵyndardan kelip túsken saýalǵa oraı.
Erlan Turǵymbaev mundaı júzdesýlerge ruqsat berýge áli erte ekendigin jasyrmady.
«Ázirshe taralý qaýpi (koronavırýs indetiniń) bar. Onyń ústine, kolonııada sottalǵandar bir-birine jaqyn júredi. Bas bostandyǵynan aıyrý oryndarynda vırýs taralyp ketpeýi úshin karantın erejelerin qatań saqtaımyz. Sondyqtan, ázirshe karantındi ustap turamyz. Sanıtarlyq dárigerdiń usynymymen júzdeýlerge qaıta ruqsat beretin bolamyz», - dedi ol.
