Koronavırýs qaýpi: Onkologııalyq aýrýy bar patsıentter neni eskerýi kerek

NUR-SULTAN. QazAqparat – Elimizde koronavırýs juqtyrǵan azamattardyń sany qaıtadan ósip bara jatyr. Kúni keshe ǵana PTR-test arqyly 716 adamda koronavırýs indeti rastaldy. Demek ár adam saqtyqqa kóbirek mán berýi kerek. Al osy jaǵdaıda onkologııalyq aýrýy bar azamattar neni eskerýi kerek? Bul suraqqa Nur-Sultan qalasy ákimdigi Kópsalaly medıtsına ortalyǵynyń dırektory Muhtar Tóleýtaev jaýap berdi.

«Buqaralyq aqparat quraldary arqyly koronavırýsqa qarsy álemde vaktsınanyń birneshe túri paıda bolǵanyn estip jatyrmyz. Keıbiriniń indetke qarsy pármeni 90-95 paıyzǵa deıin baratyny aıtylady. Degenmen olardyń qaı-qaısysy bolmasyn tolyq tekserýden ótken joq. Ázirge zertteý, tekserý satysynda. Sondyqtan búgingi kúni kez kelgen vaktsınany onkologııalyq aýrýy bar adamǵa jasatqan qolaısyz dep oılaımyn. Óıtkeni, ol ımmýnıtetti qozǵap jiberýi múmkin. Onkologııalyq syrqattarǵa vaktsına salynǵany týraly ázirge málimet joq. Vaktsına ázirge resmı túrde qabyldanbaǵanyn umytpaıyq», - deıdi Muhtar Tóleýtaev.

Koronavırýstan qorǵaný úshin onkologııalyq aýrýlary bar azamattar neni eskerýi kerek? Bul suraqqa jaýap bergen onkolog-maman qarapaıym qaýipsizdik erejeleriniń saqtalýy kerektigin eske saldy.

«Buǵan deıin dárigerler aıtyp kele jatqan qaýipsizdik sharalaryn qatań saqtaǵan durys. Onkologııalyq aýrýy bara azamattar, kóp adam jınalatyn orynǵa meılinshe, barmaýy kerek. Maska taǵyp, qarapaıym erejelerdi saqtanǵany durys. Onkologııaǵa shaldyqqan adamdardyń arasynda koronavırýsty juqtyrǵandary kóp emes. Ol kisiler saqtyq sharalaryn ustanyp keledi dep esepteımiz», - dep sózin jalǵastyrdy onkolog-maman.

Elordadaǵy indet ýshyqqan maýsym-shilde aıynda Kópsalaly medıtsına ortalyǵynyń mamandary esepte turǵan naýqastarǵa dári-dármegin úıine jetkizip beripti. ıAǵnı naýqastar ortalyqqa kelmeı, telefon arqyly habarlasyp, dárigerden keńes alǵan. Al jergilikti emhananyń onkologtary ýchaskelik nemese otbasylyq dárigerler arqyly syrqattarmen qarym-qatynasta bolǵan. Sebebi olar úshin halyq kóp jınalatyn oryndarǵa barý qaýipti. Patsıentter Kópsalaly medıtsına ortalyqqa nemese emhanaǵa kelýi mindetti bolǵan kezde ǵana (máselen dıagnostıkaǵa) baryp júrgen.

«Onkologııalyq aýrýlary bar adamdar bizdiń ortalyqqa em-dom alý úshin kelmes buryn jalpyǵa ortaq klınıkalyq tekserýden jáne koronavırýs ınfektsııasy boıynsha PTR-testten ótedi. Tekserýdiń bul túrinen olar jergilikti emhanadan ótýi tıis. Qaladaǵy emhanalardyń Kópsalaly medıtsına ortalyqpen kelisimi bar. Emhanalar analız qorytyndylaryn jıyp, bizdiń zerthanaǵa joldaıdy. PTR-test qorytyndysy boıynsha koronavırýs juqtyrǵany belgili bolsa, patsıent ınfektsııalyq statsıonarǵa jetkiziledi. Ol jerde aldymen koronavırýstan emdelip alýy tıis. ıAǵnı koronavırýstan emdelip jatqan naýqastyń onkologııalyq em-domy shegerilýi múmkin. Al ondaı sımptomdary bolmasa, ol kisiler emin ary qaraı jalǵastyrady. Meniń oıymsha, búginge deıin koronavırýstyń onkologııalyq aýrýlardy týyndatýǵa sebep bolǵan jaǵdaı kezdesken emes. Óıtkeni onkologııalyq aýrý aıaq astynan paıda bolmaıdy. Mysaly, sozylmaly aýrýy bar adam ýaqtyly emdelmese, onyń aýrýy keleshekte onkologııaǵa aınalýy yqtımal. Bul rette 100 paıyz onkologııamen aýyryp ketpeıdi. Biraq onkologııalyq aýrýlardy mundaı jaǵdaıda aǵzada paıda bolý yqtımaldyǵy joǵary. Sondyqtan koronavırýstyń onkologııaǵa sebepshi bolǵany týraly málimet joq. Olaı bolmaıdy dep te oılaımyn. Sebebi bul vırýstyq ınfektsııalar sııaqty ótetin syrqat», - dep túıdi Muhtar Tóleýtaev.